【搵食CONY】私心推介　九龍城家庭式泰菜

每次想食泰國菜，都不期然諗起有「小泰國」之稱嘅九龍城，除咗因為呢度匯集咗好多泰國菜館，更因為呢度有好多泰國人居住，佢哋開嘅泰國菜館感覺正宗，而且家庭式經營俾人一種親切嘅感覺同滿滿嘅人情味。會去九龍城搵食嘅你或者同CONY一樣，就算想試新嘢，最後都會去返平時食開嗰間泰國菜館，而今日CONY就同大家分享自己去開邊間啦！

位於南角道嘅「泰式燒王」，我同屋企人好鍾意去。坦白講佢嘅裝修一般，不過小店嚟講佢哋座位尚算闊落，唔使同隔籬枱貼枱咁坐，同屋企人普普通通出街食餐飯都算okay啦。

講返食物，呢度叫「泰式燒王」，佢哋嘅燒物當然有返咁上下，而當中沙嗲肉串係必嗌，肉串燒得恰到好處不在話下，沙嗲串最緊要當然係沙嗲汁，惹味得嚟充滿花生香氣，每次都食唔停口。除此之外，好多人食泰菜都鍾意嗌嘅燒豬頸肉，佢哋都做得好出色，不但份量足，豬頸肉燒到外脆內軟又juicy，點埋佢哋秘製嘅酸辣汁簡直冇得輸。

另一樣我同屋企人每次嚟到都會嗌嘅就係明爐烏頭，我哋習慣加錢轉冬蔭功湯底，除咗因為會令魚更加惹味之外，湯同魚煮一陣之後會減退辣味，而且更加鮮甜！佢哋用嘅烏頭大條新鮮，肉質唔會霉，仲有好多雞脾菇、椰菜同肉碎等配料，每次食都覺得好滿足。

有一道菜CONY每次食泰菜都一定會嗌嘅就係Pad Thai（泰式炒金邊粉）啦！個人認為想知一間泰國菜館正唔正宗，就一定要試佢哋嘅Pad Thai。首先色澤一定唔可以係化學嘅鮮橙色，而且金邊粉要炒得乾身之餘要條條分明，配料方面都唔可以馬虎，用上新鮮蝦、豆乾、蛋絲、芽菜同韮菜，味道方面要食到突出嘅酸甜味道，而「泰式燒王」絕對做到！

另外，佢哋嘅炸蝦餅香脆厚肉，而且帶爽口，好食。青咖喱豬肉雖然唔係特別出色，但係好多蔬菜配料，至於佢哋嘅薄餅煎得乾身香脆，不過CONY偏愛外脆內軟的口感，所以佢哋嘅薄餅唔係我杯茶，但喜歡香口嘅人士就應該會好鍾意。

雖然CONY讚到「泰式燒王」好似天下有地下無咁，但只係因為佢哋嘅菜好啱小妹一家嘅口味，相信每位讀者心目中都有一間自己食開又好喜歡嘅泰菜館或者食店，大家不妨留言，同CONY和其他讀者分享一下！

泰式燒王
地址：九龍城南角道19號地下
電話：2383 1595