話咁快星期一就係中秋喇！相信大家除咗賞月之外，一定唔少得食月餅。
依家市面上嘅月餅花樣百出，真係諗得出嘅都有可能做出嚟，好似傳統雙黃蓮蓉月、傳統五仁月餅、流沙奶黃月、冰皮月餅、雪糕月餅等。不過大家點先可以玩得開心之餘，仲可以食得健康呢！？小編今次就同大家研究吓喇！
1.傳統五仁月餅
傳統五仁月餅聽起嚟就好健康喇！不過其實佢先係最隱藏危機呀，每個五仁月餅每100克就有超過420Kcal嘅熱量，糖份更超過30克。講明五仁月餅，當然餡料中不乏健康嘅果仁，不過果仁本身有油，再加上豬膏、豬油或果仁植物油，每克油分已達到4卡路里嘅熱量，真係油上加油，絕對肥到爆！
2.傳統雙黃蓮蓉月餅
之前降低食物中鹽和糖委員會就有指四分之一個雙黃蓮蓉月餅嘅卡路里就已經接近200卡，近乎一碗飯熱量，要跑30分鐘或游泳50分鐘先消耗到。雖然一年唔係成日食，但如果冇節制，喺中秋期間每日食一個月餅，咁就唔係咁好喇！
3.迷你流沙奶黃月
至於近期比較流行嘅流沙奶黃月餅，每個約50克中就含有190卡路里，大約有1碗飯、2茶匙油、2.5茶匙糖，所以建議大家每次最多1個就好喇！
4.冰皮月餅
除咗傳統月餅之外，近年唔少人都會選擇食冰皮月餅。而總體嚟講冰皮月餅嘅熱量係比傳統月餅低。因為一個冰皮月餅大概每100克就有290-350Kcal不等，視乎餡料而定。
5.雪糕月餅
至於雪糕月餅，可能大家提到雪糕就一定會卡路里係最高，不過大家估錯喇！每100克雪糕月餅嘅只有大約279Kcal，相對比其他月餅，熱量是比較低的。但係都係唔好食太多呀！
最後祝大家中秋節快樂之外，介紹多個消滯花茶畀大家呀！
茉莉花決明子茶
材料：茉莉花 6g、決明子 30g、烏龍茶葉 6g
做法：1. 先用500毫升水將決明子煲滾，滾後轉中小火煲約30分鐘。
2. 將決明子水加入茉莉花和烏龍茶葉，焗泡即成。
茉莉花決明子茶唔止可以消滯，仲有效潤腸通便㗎！大家不妨試試！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0