有睇《愛回家之開心速遞》嘅觀眾一定認得劇中接龍集團人事部副經理Rebecca（沈可欣飾），喺最新一集更同暗戀多時嘅鐵面陳（王致狄飾）「感情大躍進」！沈可欣喺劇中飾演寂寞難耐嘅女人，演得出神入化，可能有觀眾更以為佢現實都係咁！但其實沈可欣早前已經同同為藝員嘅楊證樺結婚，婚後更育有2個小朋友，係一個幸福嘅太太同媽媽！

撰文：Kammy｜圖片來源：節目截圖、Facebook

沈可欣演活寂寞中女

現年43歲嘅沈可欣係資深綠葉演員，演出劇集無數，近年喺《愛回家之開心速遞》飾演人事部Rebecca最為人熟悉。喺劇中Rebecca一直單戀保安主任鐵面陳，更對對方展開猛烈追求。

最新一集講到Rebecca喺美國返嚟，期間一直同鐵面陳有書信來往，以為對方對自己有意思，仲幻想將來會結婚，點知全部都只係自己心入面嘅諗法。雖然係咁，不過沈可欣喺入面嘅演出就得到唔少網民讚賞，唔少人更希望佢同鐵面陳最終可以開花結果！

不過，心水清嘅觀眾都可能記得，Rebecca其實早前喺劇中已經消失咗段時間，事關早前沈可欣同老公楊證樺再次「造人」成功懷孕，要放產假休息，喺劇中先有呢個去英國受訓嘅安排！

現實為幸福人妻

同為大台綠葉演員嘅楊證樺同沈可欣2015年結婚，二人一直恩愛，並育有2位小朋友，一家四口十分幸福。其實楊證樺同沈可欣早已認識十多年，但真正走埋一齊就只是近幾年嘅事。

兩人合作拍劇無數，但從來唔過電，直至幾年前timing到，兩人恰巧搬到附近居住，約食飯多見面後終於走埋一齊，對於戀情十分低調，唔少藝員同事更直至佢哋結婚才得悉，仲以為佢哋係拍緊戲添！沈可欣曾表示：「嗰日有其他同事嚟觀禮，即刻將啲相擺上facebook，有同事睇到就問拍緊咩劇？我話係真㗎！之前有人問咪講拍緊拖，冇人問就唔會講囉。」

夫妻檔拍住上

楊證樺同沈可欣喺TVB默默耕耘多年，一直安於自己位置，因為佢哋明白每套劇集都係team work，要有主角、配角同綠葉先可以成就一套劇集，正如每個家庭都會分工合作，每人都有自己崗位。楊證樺笑言大仔係佢嘅是福星，因為自大仔出世後，兩人獲得更多演出機會，甚至一齊做夫妻角色，「監製一諗起要搵人做夫妻，就會諗起我哋。」

早前無綫劇《踩過界》成為城中熱話，「盲俠大狀」王浩信固然獲得好評，但在其中一單元「疏忽照顧兒童案」中，飾演聾啞夫婦嘅楊證樺同沈可欣獲網民大讚演技出色，大家更信唔到兩人喺現實中亦係夫妻！無論戲份多少，兩人對每個角色都十分認真，經常一邊湊仔一邊刨劇本。

楊證樺沈可欣細仔出世

去年12月10號楊證樺、沈可欣嘅細仔出世啦，佢哋選擇喺公立醫院生BB，佢哋特別出POST鳴謝醫護人員照顧，阿Man細仔重3.27KG，都算係大碼BB，佢又透露有全程陪產同親手剪臍帶，問到會唔會追多個囡囡，佢話未必會，因為怕太太陀B辛苦，而且見到太太生B好痛佢都好心痛，所以暫時兩個都夠曬數。

感恩喜獲第二胎

早前楊證樺喺個人社交網公佈喜訊，表示佢哋一家三口將會增添一個新成員，變成一家四口！佢更留言指感謝上天嘅安排，呢個BB係佢哋嘅第二份禮物。

楊證樺留言後，亦同時Po出一張BB嘅超聲波相，唔少網友知道呢個好消息，都戥佢哋高興，紛紛留言送上祝福！

楊證樺沈可欣曬靚靚孕照

雖然已經係第二胎，但係可欣都係第一次影大肚相。本來陀大仔宏志嗰陣，就已經約好日子影相，點知大仔衝閘，提早出世，所以最後就影唔到，當時可欣都好失望架，仲喺產房喊咗出嚟！

第一胎影唔成，到有咗第二胎，證樺都好體貼咁為老婆圓咁呢個夢，仲同埋大仔一齊影！幾溫馨！

為咗令輯相嘅美感，楊證樺仲即興除埋上身衫陪老婆一齊影！

媽咪話曬都係港姐，靚就一定㗎啦！

媽媽嘅溫柔，完全表現曬出嚟！

呢胎都係仔，不話楊證樺就話一切都係順其自然，冇咩生仔秘方，一直同太太都想生多個，等大仔有個伴。

證樺話，知道老婆上次影唔到輯相好唔開心，今次就待登預早啲影，達成老婆嘅心願。

仲話如果唔使開工，自己都會用手機，日日同老婆影張相，為孕記做紀錄。

因囝囝抽筋暈倒楊證樺有了人生啟悟

佢哋曾喺電視節目中，提及囝囝楊宏志(Eugene)上年突然發燒，睇醫生後久久未退燒，之後楊證樺揸車去醫院途中，囝囝更突然抽筋，然後暈倒、失去知覺。

當時沈可欣已經喊到死去活來，以為囝囝咁就走咗… 幸好十多秒後囝囝有返喊聲，楊證樺個心先定落嚟少少。

人生最深刻一次

去到醫院，囝囝再度失去知覺，醫生馬上為Eugene進行急救，好彩最後平安無事。沈可欣憶述當時有人同佢講「頭先你個仔個嘴變咗紫色」，佢話佢寧願唔知道，嚇死佢哋。佢哋話，依一次係佢哋人生之中最深刻嘅一次。

楊證樺講述當時嘅心情：「去到嗰一刻，我原來所有嘢都可以唔要，我只要個仔。」

楊證樺《BB來了》演「人渣老竇」

大台劇《BB來了》中，楊證樺(Man)飾演嘅「阿成」唔止爛佬兼一度走佬，佢因黎諾懿放片上網而被封佢做「人渣老竇」，最後佢迫到佢被網絡公審，佢又以為徐榮勾引佢老婆楊卓娜，一時衰衝動怒斬徐榮，搞到囝囝爭啲被車撞，而佢自己都因而要入獄，下場都係最慘嘅一個！劇中衰到貼地，但現實生活不知幾幸福！

因為黎諾懿呢個港爸KOL走火入魔為搵錢而出賣朋友及家人，仲將佢鬧阿成唔識做人老竇嘅短片放上網，結果阿成被封做「人渣老竇」！他之後多次同徐榮起衝突，又跪求同妻子復合不果，兒子龍仔更直指「人渣爸爸，我唔要你做我爸爸，Ben叔叔至係我爸爸，楊證樺大受刺激下刀傷害徐榮，但龍仔跑出馬路時，徐榮為救佢而被車撞到入院。終於被判坐監！

曾當舞蹈員參加新秀入行

太太沈可欣喺2000年底演藝學院畢業入行，而老公楊證樺（Man）原來曾做舞蹈員，1996年喺美國紐約參加「全球華人新秀歌唱大賽」（同屆冠軍為何韻詩），取得當地冠軍後回流香港，冇參加香港舉辦嘅總決賽而直接加入TVB。問到點解唔參賽同何韻詩較量？「我知我輸梗㗎喇，諗諗吓覺得演員條路長啲，咪直接簽TVB藝員約。細個發明星夢先參加歌唱比賽，但歌星好講機遇，有機會當然都想做。」

阿Man入行前一直做舞蹈員，但有感舞蹈員生涯短暫，做演員卻可以做到老。「Dancer可以跳到幾多歲吖？30幾歲都硬晒啦，就算轉做排舞師都有限，做演員就可以做到80歲，演出範圍亦闊好多，我鍾意做日本人都得呀。」阿Man在默默耕耘下，終憑2010年無綫劇《巾幗梟雄之義海豪情》嘅日本人宮崎隊長，獲金牌監製李添勝及觀眾大讚，即使未必講得出真名 楊證樺 ，觀眾都一定認得宮崎隊長。

4間食肆老闆

楊證樺家庭、事業兩得意，除了演員，他另一身份是餐廳老闆，因為他現已經營4間食肆，好叻！