【搵食CONY】銅鑼灣、尖沙咀驚現$58火鍋套餐　仲有多款自選湯底同配料

話說CONY聽到有人表示小妹介紹嘅嘢太貴，雖然貴唔貴係見人見智，但係CONY一向好重視讀者嘅意見，絕對唔係大家所諗嘅港女（大家誤會得我太深啦～淚奔），即刻閉關兩個星期搵食（絕對唔係因為太熱而唔出街搵食，絕對唔係呀吓），終於打聽到有間主打特色火鍋嘅餐廳近日推出58蚊午市火鍋，聽落好抵，即刻搵埋同事們一齊去做白老鼠！

而家打邊爐不分季節，基本上總有一間火鍋店喺左近，面對龐大又充滿競爭嘅市場，火鍋店都愈來愈有特色和噱頭。「酒鍋」以新派湯底見稱，並以「湯底炸彈」作招徠，而揉合了現代與傳統風格嘅特色裝修更令人感覺別具氣派。近日佢哋又有新搞作，就係推出58蚊（加一）全新午市迷你火鍋套餐，大家可以自選湯底之餘，再揀一個麵底和三個餸，仲送一杯台式飲品。

多款特色湯底、配料任君選擇

打邊爐最緊要係湯底，六款選擇除咗傳統嘅「濃湯豬骨」、「潮州沙嗲」、「足料番茄洋蔥紅蘿蔔豬展」及「台式麻辣」外，仲有比較有特色嘅「黑松露雜菌」同「台式老火養生燉雞湯」，佢哋分別仲可以加「重量芝士蓋」同「日式大阪燒蓋」。餐廳又特設「番茄雜菜湯底」，就算同行有素食者都照顧到。至於麵底方面就有粉絲、米線、泡飯同公仔麵選擇，加錢可以揀出前一丁、讚岐烏冬或者魚麵。配料則有近30款，所以CONY唔細數啦，直接同大家分享下我揀咗咩啦！

CONY揀咗番茄豬展湯、魚麵、秘製麻辣花膠、肥媽墨汁墨魚腸同萵筍。初初以為火鍋配料另上，自己放落去烚下烚下，但原來係一鍋過上，所以大家記得滾起之後就可以較慢火呀。每個湯底都配有少少娃娃菜、木耳同番茄仔，感覺貼心。

個人認為麻辣花膠好抵食，一來花膠比較矜貴，二來仲有兩大件，入味非常又辣得過癮。 一聽墨汁墨魚腸都覺得特別，爽口微甜幾好食。至於萵筍唔係間間火鍋店都有，佢吸湯之餘又可以保持爽口，冇得輸！而魚麵嘅質感比我想像中有啲唔同，完全係魚蛋嘅麵條版，冇諗過咁爽口但又出奇地好食，啱晒唔想食太多澱粉質嘅朋友，不過男仔食完應該會唔夠飽。

同事A叫咗養生燉雞湯底、米線、麻辣鴨血、龍蝦沙律丸同冬瓜。CONY偷飲咗佢個湯底，好足料好鮮甜，米線吸晒湯嘅精華，一個字，好正 。不過麻辣鴨血放咗喺雞湯度就變得一啲都唔辣，而且份量不多，同事有少少失望。冬瓜有兩大片都幾新鮮，而龍蝦沙律丸都係平常食開嘅丸，就不多講啦。

有錢同事B就揀咗麻辣湯底、烏冬（加12元）、自家製鮮蝦雲吞丶金菇、安格斯肥牛（加20元）、黑毛豬腩片（加20元）。盡責嘅CONY梗係試食埋佢個煲啦！不過唔係講笑個湯底堅辣，食埋烏冬真係不得了，之但係又麻又辣好過瘾，簡直係令人又愛又恨！自家製鮮蝦雲吞細細粒容易食，而且新鮮足料。要加錢嘅肥牛同豬腩片都冇令人失望，肥瘦均勻，肉味頗濃。

飲品方面，我哋都揀咗跟餐嘅芝士奶蓋靜崗抹茶，味道不過不失，不過一杯台式飲品單買都要十幾廿蚊一杯，所以作為跟餐飲品嚟講感覺有誠意，而且佢用外賣杯裝，打完邊爐可以拎返公司慢慢飲。

最後提提大家如果三款配料唔夠食，仲可以額外追加配料，每份只需8蚊，除咗以上我哋試過嘅配料之外，秘製炆牛筋腩、福州丸湯包、台灣蜂巢豆腐同自家製即炸魚皮都係比較有特色。另外，價錢不包醬料，無醬不歡的人要注意啦。總括而言，平日食個茶記都要50蚊，58蚊加埋一食到個好少少，又坐得舒服嘅lunch算係不錯。

酒鍋

地址：尖沙咀天文臺道8號2樓1號店／銅鑼灣登龍街18號V Point 27樓全層

電話：2321 9038（尖沙咀）／2323 7098（銅鑼灣）