【搵食CONY】精選6大品牌特色月餅　酒店限時劈價、名人加持

上次CONY為大家介紹咗唔少本土小店嘅中秋禮盒，不過如果送禮嘅對象比較著重品牌知名度，又或者last minute先發覺要送禮，連鎖品牌就會係救星。今次CONY就為大家精選咗多個連鎖或知名品牌推出嘅特色月餅，等大家有更多選擇！

酒店月餅限時劈價

大家可能會覺得酒店月餅價錢好離地，但其實都唔一定。好似萬麗酒店嘅「滿福樓」今年就有優惠，3款招牌月餅都有高達65折嘅限時優惠，其中必搶嘅當然係限量供應 500盒嘅「迷你貓山王榴槤月餅」，佢用上曲奇皮而唔係坊間常見嘅冰皮製成，加埋超香濃又足料嘅貓山王榴槤蓉，口感更有層次，榴槤控切勿錯過。

滿福樓招牌迷你月餅$318/6件（9月10日前購買：$206.7）：包括傳統之選「迷你蛋黃白蓮蓉月餅」及揉合東南亞風情嘅「迷你斑蘭蛋黃月餅」各3件。

滿福樓
地址：灣仔港灣道一號香港萬麗海景酒店
電話：2802 8888
訂購網址：https://www.buys.hk/renaissance-harbourview

Chef Nic監製特色奶黃月餅

由謝霆鋒「Chef Nic」創立嘅品牌「鋒味」推出全新奶黃月餅禮盒，內含「班蘭味奶黃月餅」及「焙茶味奶黃月餅」，將熱帶風情與日式茶道集於一身。而呢款禮盒今年連同「鋒味月餅」禮盒以限量特別版登場，冇得單買，不過就方便大家一次過試勻多款月餅口味。

班蘭味奶黃月餅（上）加入椰漿調配，令班蘭香氣更突出，而焙茶味奶黃月餅（下）則混合法國鮮忌廉中和茶嘅苦澀，食起嚟烘焙茶香濃郁，最後滲出回甘滋味。

鋒味月餅禮盒$258（9月14日前購買 $178）：裡面有巴馬火腿蓉月餅（左）及鋒味月曲奇（右）。

訂購網址：https://shop.chef-nic.com/en_HK

西方名畫藏中式月餅

藝人陳敏之有份投資嘅「祝奇餅（Blesscuit）」今年與「Van Gogh SENSES」合作，推出「祝．杏福」月餅禮盒。包裝以梵高名畫《盛開的杏樹》為主題，並內藏花花造型嘅「迷你蛋黃白蓮蓉月餅」及「迷你杏仁紅豆月餅」，凡購買2盒仲可免費獲贈「靈芝生薑祁門紅茶」一罐及免費送貨服務。

月餅造型以精緻花朵為設計，每個月餅更有如戒指盒般嘅獨立包裝。至於口味方面比較傳統，但就用上較健康嘅麥芽糖醇製作，因此比傳統月餅冇咁甜膩。

訂購網址：https://bit.ly/mooncakes2020

純素版五仁月

有唔少長輩都鍾意食五仁月餅，因為佢油香滿溢，又有嚼勁，但係高脂高膽固醇，食得多容易影響健康。素食超市Green Common推出嘅「開心團圓純素月餅禮盒」或者係唔錯嘅代替品，內藏2款新口味月餅，包括「開心無花果燕麥月餅」和「團圓果仁紫薯月餅」，均用上不同果仁製作，再配合果乾和其他superfood，口感與五仁月餅相似，但就清新同健康得多。