【端午節】食糉一定滯？睇片學包小清新紫薯水晶糉

傳統節日的應節食品往往離不開肥、膩、油，雖然全部都好好味，但食完總覺得有罪咎感。熊大同Cony深明大家的苦惱，所以今個端午節特意找來「美女廚神」Celia教大家整紫薯水晶糉！係……又係「紫薯乜乜乜」，不過紫薯含有花青素，可抗衰老及保護心臟，大家多吃無妨，今次更用上西米代替糯米，可以減少大家的飽滯感覺，讓大家fresh住過端午。即刻睇片跟Celia動手做！

紫薯水晶糉材料（份量8小隻）

餡材料：
紫薯 110克
糖 2-3湯匙
椰奶/忌廉 20克

水晶糭材料：
西米 180克
水 110毫升
油 1.5湯匙
沙糖/楓糖漿 4-5湯匙
糉葉 8片
咸水草適量

步驟：

1. 紫薯洗淨去皮蒸熟後，用叉壓成蓉，加入糖和椰奶拌匀。

小貼士（一）：紫薯先去皮再蒸，可減少因紫薯肉黐皮而產生的浪費。

2. 將紫薯搓成圓球備用（約12克一個）。

小貼士（二）：如紫薯蓉太乾不能成形，可加入少量菜油或椰子油。

3. 西米洗淨後加入水、油和楓糖漿拌匀備用。

4. 糉葉洗淨後放入滾水烚15分鐘，然後熄火焗15分鐘，再用水洗淨、瀝乾。

5. 取一片糉葉，捲起成漏斗狀。

6. 放入一小匙西米，然後放入紫薯饀，再放入一小匙西米蓋住饀，輕輕壓實。

7. 上方的葉子折下來，包成三角形狀，再用咸水草或綿繩扎實。

小貼士（三）：勿扎得太實，否則糉會因烚糉時西米膨脹而爆開。

8. 將糉放入滾水烚30至40分鐘， 熄火焗10分鐘便可。

小貼士（四）：完成後，建議把糉雪藏在雪櫃，凍食味道更佳。

小貼士（五）：品嚐時可配搭楓糖漿，味道更清新。

場地提供：Cooking Fever

更多美食分享：Celia Chan Facebook（https://www.facebook.com/celiachankitchen/）