上星期為大家介紹了海鮮火鍋速遞，一解「抗疫疲勞」。今個星期CONY繼續為大家介紹其他好西速遞。最近實試咗一間名為「Yeah Express」和牛燒烤外送網店，標榜每晚凌晨12點截單，隔日送貨上門。在追求「快、靚、正」嘅網購世界中，「快」方面就做得唔錯，至於「靚」同「正」又做唔做到？即睇CONY報告啦！
網店主打日本A4和牛外送燒烤，設有自家工場每日新鮮切割肉類同準備食材，至於貨源來自世界各地，聲稱食材邊度好就拎邊度。網店又根據人數提供2、4、6及8人套餐，亦有特色套餐如「牛魔王套餐」及「和牛x生蠔套餐」，套餐價錢$699起。而今次CONY就訂咗「和牛漢堡4人套餐」，當中包括各種肉類、海鮮、蔬菜，仲有烏冬及自家製燒汁，款式豐富。
和牛漢堡4人套餐$1388睇下有咩食：
日本宮崎A4和牛一件 和牛為薄切，記得唔好燒太耐。肉片嘅油花分布平均，肉質柔嫩，一咬落去和牛嘅油脂完全散發出嚟。 澳洲和牛肩胛180克 澳洲和牛肩胛比宮崎A4和牛較厚切，肉質雖然不如日本和牛細嫩，但口感會更豐厚更滿足，而且牛味更香濃。 美國原條牛仔骨兩條（前）；日本雪霜一口牛、澳洲和牛漢堡粒及芝士雞胸一口漢堡（後） 各款一口漢堡燒完都唔知邊款打邊款，剩係認得有芝士嗰款係雞胸漢堡，唔韌之餘，有流心芝士，味道不俗。 海鮮方面有磯燒鮑魚4隻（前左）、海鹽鬼蝦4串（前右）及蒲燒鰻魚1條（後）。當中磯燒鮑魚十分入味，日式的香甜醬油風味，肉質鮮嫩彈牙；而鬼蝦串十分大隻，唔會燒完乾噌噌。 其他肉類仲有紐西蘭蒜香雞翼8隻（前）及日本豬梅扒1件（後）。CONY覺得雞翼蒜香可以再濃啲，而豬梅扒肉質軟稔，好有衝動想好似韓式燒肉咁包生菜食！ 蔬菜類有來自本地嘅翠玉瓜（前左），新鮮爽脆，還有日本甜薯（前右）及厚燒玉子（後），全部都份量慷慨，其中玉子燒完全是日本吃到的味道，CONY食到好滾動。 網店嘅自家燒汁味道微酸清新，可配搭不同肉類，而且能減去膩感，又唔會掩蓋食材嘅原味。最後還可以用來炒烏冬，完滿結束燒肉大餐。 如果屋企冇燒烤爐都唔需要擔心，可以$225加購，價錢相宜，而且CONY覺得燒完都唔會好大油煙。總括而言，CONY幾滿意呢次嘅燒肉外送速遞，套餐包括嘅食材選擇豐富，共有16款，而且每樣質素不俗，當然如果和牛份量再多啲就更好啦！整體份量方面，最尾CONY已經太飽食唔落烏冬，所以如果再細食啲嘅女生們可能要叫多位朋友幫手啦。另外提提大家，肉類除咗可以點蘸網店附有嘅燒汁，CONY亦建議可以灑少少鹽代替，尤其係和牛，就更能食出佢嘅原味啦。
Yeah Express 訂購詳情
留言 1
尤
疫情之下冇胃口食咁豪
2020年08月06日13:54
顯示全部