四日復活節長假終於嚟，一講放假，點止耶穌復活？我哋呢班打工仔都復活啦！假期唔出埠，當然要搵班朋友聚聚舊，除咗食好西，最好就摸吓杯底傾心事。貼心嘅搵食CONY就為大家身先士卒去一間位於蘇豪，主打本土風味嘅酒吧餐廳試吓佢哋個新menu，等大家可以趁住今日happy Thursday或者復活節假同朋友happy一番。
呢間名為「何蘭正」嘅酒吧，土生土長香港人一聽個名就識得笑，夠晒幽默，而佢嘅裝修亦充滿本土懷舊風情，好似紙皮石、墨綠色嘅閘門、殘舊嘅水泥地板同牆身，仲有寫住「鬼佬涼茶」嘅霓虹燈，更加係整個餐廳設計嘅亮點和打卡位。佢哋亦主打本土手工啤酒，提供嘅食物揉合咗香港和西式元素，係一間由內到外都主打本土嘅酒吧餐廳。
話說何蘭正開咗大約兩年，可能有唔少人都嚟過飲酒打卡，不過就未必知道佢哋近日轉咗全新menu。以往佢哋嘅佐酒小食比較多，但近日就改變風格，將酒吧和餐廳結合，創作咗更多主食和份量較大嘅主菜。至於飲品方面，就繼續主打本地製造嘅手工啤酒。
何蘭正而家個menu近8成都係新菜式，搵食CONY梗係試唔晒，試咗其中四款，就同大家分享一下。首先我哋嗌咗呢度嘅經典小食「黃金脆雞配泰式辣醬」送酒。冇諗過一個以為好普通嘅炸雞佢哋都做得好出色，炸粉薄身之餘，雞亦炸得嫩滑juicy，而且泰式辣醬酸辣醒胃，連CONY嘅韓國同事都話「馬斯打（韓文好好味嘅發音）」！
新菜式貫徹佢哋創新而巧用本土食材嘅風格，好似「四川風味慢煮口水鴿配枝竹及牛肝菌」，就揉合咗廣東菜常用嘅乳鴿作為主角，以西式的慢煮烹調法製作出一道四川麻辣風味嘅菜式，完全係別出心栽。乳鴿仲要幫大家起埋骨，啖啖肉，而且因為係慢煮嘅關係，肉質十分細嫩。雖然係四川風味，但唔算好辣，麻香十足，嗜辣嘅朋友可能會覺得唔夠辣，但對平時食開五小辣嘅CONY嚟講就啱啱好。
另一道菜「焗珍寶大虎蝦配魚香茄子蓉、咸魚沙巴翁汁」係CONY大愛！ 雖然虎蝦係成道菜嘅主角，但CONY認為旁邊嘅炸饅頭先係亮點同精髓，因為用佢嚟點汁食好夾，成個配搭更加香口惹味，如果可以有多啲饅頭就好啦！
我哋仲試咗「沙嗲和牛臉頰配煎腸粉」，牛臉頰嘅肉質一向較為軟稔，仲要係和牛，口感完全冇得輸，不過個人認為味道淡咗少少，而且煎腸粉乾身咗少少，唔係就perfect池啦。最後當然唔少得甜品，「半乾木瓜配百合鮮奶，雪燕，榛子芭菲」有少少似木瓜雪耳嘅西式版，唔單只擺盤精美，成個甜品嘅組合味道好夾之餘，仲好養顏。
雖然CONY好純情，但嚟得酒吧當然免為其難都要飲返兩杯，嗰日我就揀咗「城釀酒廠」釀製嘅桂花啤，佢比一般手工啤酒口味較淡，亦較易入口，好啱女仔飲。總括嚟講何蘭正嘅新menu其實幾有心思，嘗試為大家製造驚喜，而CONY都想下回再戰，試埋佢哋其他新菜式！
何蘭正
地址：中環蘇豪卑利街65-65A號地舖
查詢：23422224
留言 0