【搵食CONY】5款夏天零食新品開箱　台灣古早味VS本土經典

夏天嚟到，CONY為大家精選咗幾款熱辣辣都有胃口嘅零食新品。相信有唔少人喺炎熱天氣都會食慾不振，今次為大家介紹嘅零食主要來自台灣及本土品牌，味道較清新輕盈，甚至可以幫你消暑下火，係咪好貼心呢？

香脆黑鑽菇零食唔怕肥

第一款要介紹嘅係相對健康，而且素食者都啱嘅「黑鑽香菇酥」。由來自台灣的「菇字典」出品，以原朵香菇低溫多次烘烤真空工法製成，不經油炸，再加入不同調味，包括「鹹酥味」、「黑胡椒味」和「芥末味」，同時又嚐到原始香菇嘅味道和香氣，最重要嘅係可以解決口痕需要之餘，都唔怕會打破夏天騷健美身段嘅計劃。

銷售點：官方網店、威靈頓辦館、一耕及友營食品

爆谷扮甘梅地瓜球

既然有排未去得旅行，下一款繼續介紹台灣零食啦。CONY去夜市好鍾意食加入梅子粉嘅地瓜球，而每年都會推出一款台式口味嘅「Magi Planet星球工坊」，今年就將2019年推出嘅「雙色地瓜爆谷」風味升級，推出古早味十足嘅「甘梅地瓜爆谷」，以台農57號黃金地瓜作基調，再加入梅山半熟青梅，還原咗甘梅地瓜球嘅味道！

銷售點：Magi Planet星球工坊門市與官方網站、HKTVmall、台灣禮籃、士多Ztore

小清新柑橘手工啤係損友？

夏日熱辣辣，第一時間想起嘅多數唔係食嘢，而係飲嘢。「友」手工啤酒近日推出別具清新果香的全新柑味「最佳損友」Tangerine IPA，係經典「West Coast IPA」的地道變奏，同樣以小麥為基礎，再加入切合香港人口味的柑橘萃取物作主要原材料，為傳統IPA帶來不一樣的清新氣息。

銷售點：「友x 7-Eleven」中環概念店及指定7-Eleven分店

注入氣泡感覺更爽

唔飲酒嘅朋友都可以留意另一款新飲品，就係維他有氣檸檬茶「Sparkling VLT」，保留咗原有紅茶及檸檬嘅調配比例，再注入氣泡，雪凍飲用仲可以「啹一啹」，為炎熱夏天更添清爽。

銷售點：百佳、7-11、Circle K、Aeon、大昌食品專門店、家興超市、佳寶食品超市、The Fresh及Soda Mall

經典雪條限量本土包裝

最後一款要介紹嘅其實唔係「新品」，唔少八、九十後仲好熟悉㖭！雀巢牛奶公司近日聯乘本地插畫家麥震東「麥東記」，將4款經典口味雪條以舊香港為主題重新包裝，當中包括紅豆樂、脆皮樂香芋味、脆皮樂呍呢拿味及旺寶雪條。每款口味嘅包裝都畫上不同場景，勾起不少香港人嘅童年回憶。咪話CONY唔提你，包裝係限量版，賣晒就冇㗎喇！

銷售點：百佳、惠康及各大超市