【搵食CONY】一餐團年飯食勻三種傳統中菜

新年今個星期就到，大家都密鑼緊鼓咁同親戚朋友食團年飯，搵食CONY都唔例外。今年團年飯就同家人去咗「三希樓」，呢間有齊川菜、粵菜同點心的傳統中菜館。

「三希樓」名字其實源自清朝乾隆皇收藏心愛嘅稀世名家墨寶嘅御書房「三希堂」，喻意對承傳傳統、正宗及品質嘅追求，而當中嘅「三」字亦代表剛才提過嘅川菜、粵菜同點心。今餐團年飯絕對可以滿足到唔同家人嘅口味。

首先係前菜「八小碟」，唔好聽個名以為真係細細碟，其實係「八大碗」！有齊川粵兩派嘅特色前菜，當中我最鍾意涼拌萵筍絲、蒜泥白肉同大刀耳片，即使我唔係好食得辣，都食得到，而且好惹味，蒜泥白肉同大刀耳片更夾住一片青瓜，不但提升口感，更能清新解膩。

接住就係「明爐片皮鵝」，呢度唔用鴨，而係用鵝，更加肥美而且較多肉，因為我個人喜歡連皮帶肉食，所以呢個好合我心意。醬料方面，除咗附有甜麵醬之外，仲有梅子醬，酸酸甜甜，又有另一番風味。

而家都仲係食蟹嘅季節，就試吓「香辣大肉蟹」。唔好見到咁多辣椒俾佢嚇親，以為會好辣，但其實香多過辣，辣椒、蔥、蒜等料頭炒得好香，隻蟹厚肉又入味，一個字： 超正！

蔬菜方面就有「蝦皇大白菜」，煮法有少少似黃金蝦，但係有汁版本。蝦皇開邊開得好靚，蝦殼勁易甩，方便食用，而蝦肉爽口彈牙。出街食飯好多時蔬菜都煮到好爽口，但呢度嘅大白菜就煮到好腍，完全係my cup of tea。

其他菜式仲有好足料嘅「野山椒酸辣湯」，好juicy好鮮味嘅「雞湯小籠包」，仲有辣版嘅「金湯小籠包」，最後以甜品「酒槽桂花小湯圓」作結。今餐團年飯真係好滿足！聽聞三希樓喺新年推出咗三款新春晚市套餐，但需於兩日前預訂，又有盆菜可以帶返屋企慢慢食，大家如果新年仲未諗到食乜，或者可以考慮一下。

三希樓

中環店：半山花園道51號科達中心7樓及22樓

銅鑼灣店：銅鑼灣勿地臣街1號食通天11樓1102舖