減肥方法愈出愈多，每一款方法都唔同，認真睇到眼花繚亂。但如果唔夠堅持，分分鐘就會減肥唔成功，好容易就想放棄！食飯時仔細咀嚼可以幫助消化，相信呢個說法大家一定聽過，但有助瘦身減肥你哋又聽過未呢？究竟呢個方法係唔係真係有效，早前日本綜藝節目就以邀請到搞笑藝人進行實測，一齊睇睇呢個咀嚼減肥法係唔係真係Work啦！
圖片來源：《それって!?実際どうなの課》、網絡圖片｜撰文：Sharon
最近「咀嚼減肥法」喺日本好受歡迎，傳聞話「進食時多咀嚼有助讓脂肪快速燃燒，減慢血糖增加以達至減肥瘦身的效果」，究竟呢個減肥法係唔係真係有用？於是日本綜藝節目就以咀嚼減肥法為主題，邀請到一對孖生搞笑藝人進行實測，連續3日每次進食咀嚼30次，睇下增加咀嚼次數，結果發現體重竟然有下跌！
一般人進食時嘅平均每次咀嚼為10至20次，今次實測中兩位搞笑藝人都進食相同份量嘅食物，唔需要節食，白色衫嘅Takuya會進食時每次咀嚼30次，而黑色衫嘅Kazuya就同平時進食習慣一樣。進行實測前，Takuya（白色衫）的體重為75.5kg，Kazuya（黑色衫）的體重為74.3kg。
第一日
第一日早餐係食蛋包飯，Takuya因為要咀嚼30次，所以進食時間比Kazuya長，一共用咗21分鐘先食完，而Kazuya用咗7分鐘就完食！
午餐為炸雞便當，因為便當中有炸物或者肉類，相比起早餐嘅蛋包飯，Takuya需要更多嘅時間去咀嚼，亦都睇得出Takuya樣子開始疲累。
晚餐時間就食白飯配漢堡扒，節目組指增加咀嚼次數，可以更加徹底地品嘗食物味道，特別係澱粉質食物，食落甜味會愈突出，因此Takuya食完薯角後，都大讚好似食緊薯蓉一樣！
總結第一日三餐一共攝取咗2,600卡路里。
實測第二日後，再為二人量度體重，每次進食咀嚼30下的Takuya（白色衫）增加了0.1公斤，而Kazuya（黑色衫）則增加了0.41公斤，二人嘅體重分別不大。
第二日
第二日早餐為肉醬意粉，食完早餐就留喺房間打機，兩人並保持步伐節奏一致。午餐為麻婆豆腐定食，即使係豆腐呢類容易咬嘅食物，都需要咀嚼30下。晚餐則是很豐富的牛扒定食，Takuya咀嚼次數多，下巴開始出現酸痛感覺，而多咀嚼除咗可以訓練下巴肌肉，刺激大腦防止患上認知障礙，更可預防牙周病。
第二日嘅實測，Takuya（白色衫）已經咀嚼了1926次，而Kazuya（黑色衫）就咀嚼了1409次。體重方面，冇改變任何飲食習慣嘅Kazuya，佢嘅體重比前一日輕咗0.3公斤，同第一日比較就增加咗0.1公斤。咀嚼30次嘅Takuya，第三日嘅體重係75.2公斤，比前一日輕咗0.4公斤，同第一日比較就輕咗0.3公斤。
第三日
最後一日嘅早餐係和風定食，午餐係Pancake加牛奶，晚餐係咖喱飯。
Kazuya（黑色衫）第二日嘅體重係74.4kg，經過3日後體重為74.3公斤，同第一日嘅體重一樣，冇任何變化。另外，每次進食都需要咀嚼30次嘅Takuya（白色衫）最後體重為75kg，足足輕咗0.5kg！
對於今次實測的結果，營養師表示，進食時多咀嚼，可以提升新陳代謝，有助燃燒脂肪。而且咀嚼可以分解食物中嘅營養，令減慢血糖上升，令脂肪不易囤積，從而達至減肥效果。結果證明就算是進食相同份量嘅食物，只要多咀嚼就可以減到肥！
留言 0