【英國史上最大冤案】過百郵局職員因系統錯誤　遭控告做假帳及偷竊

（本文獲原創者授權轉載。文章題目由LINE TODAY編輯所擬。）

英國近代最大規模冤案，其實係一個好悲慘嘅大衛對哥利亞嘅故事…
電視台《ITV》近日播出真人真事改篇半紀錄片劇集《Mr Bates vs The Post Office》引起極大社會回響，就連首相都要回應，亦都影響自由民主黨黨魁嘅民望。故事背景係英國郵政屈幾百個外判郵政局經營者（Sub Postmasters），令到有啲被判監、破產、失業、無晒退休金甚至自殺，被稱為史上最大冤案。警察宣布會對英國郵政管理層當年嘅惡行進行調查，而網上已經超過一百萬人聯署，要求前行政總裁Paula Vennells交回CBE勳章。

英國好多郵政局都係外判，响社區由附近街坊以士多方式經營。响二千代初，半私營嘅郵政處決定全面電腦化，當時採用Fujitsu旗下嘅Horizon系統。可惜呢個系統存在問題，而且因為英國郵政嘅官僚作風，無解決系統問題之餘，反而控告七百個Sub Postmasters做假帳甚至偷竊（穿櫃筒底），好多被法庭下令歸還佢地無偷過但系統顯示嘅「失款」。

十年間，幾百個Postmasters嘅社區郵政局嘅經營權被收回，好多要坐監、破產、失去退休金、離婚甚至自殺。直到後2016年，因為部份Sub Postmasters嘅堅持，加上跨黨派議員介入，英國郵政高層同法律部門响事件中層層隱瞞，掩飾錯誤，將責任推用刑事方式推卸比Sub Postmasters開始被揭發而停止控告Sub Postmasters。2019年五百個受害人成功以民事訴告英國郵政，响唔承認錯誤嘅情況下英國郵政開始對受害人提出賠償，直到2021年上訴庭推翻當中39位受害人被判詐騙嘅裁決，下令重新審理當年所有個案。

呢單涉及七百個受害人，被稱英國近代最大規模嘅冤案，其實仲未完結，因為摧毀好多人（有啲已經含冤離世）嘅人生，加上依家仲有幾百個曾經被定罪嘅受害人嘅案件仲未處理，當然係賠償用錢解決咁簡單。而且當中涉及英國郵政嘅管理結構，社會更要求追究責任，希望知道邊個決定同執行當年嘅行動。

呢單冤案嘅細節其實反映响特定制度下，官僚作風同心態就算响民主法治社會都可以好恐怖，一般平民嘅反抗能力接近零，响事件中好彩嘅係現實中真正存在，有勇氣不惜代價，堅持對抗巨人嘅人（現實中真正存在嘅主角Alan Bates）。
為免太長篇，簡單講下當年呢班Sub Postmasters有幾無助。

大家可能會問，點解政府檢控部門當年會幫英國郵政控告呢班無辜嘅Sub Postmasters，政府點解乜都唔知？要知道英國郵政係獨立私營官方機構，因為郵政涉及好多錢同交易，當年私有化嘅時候為咗方便管理，英國郵政本身唔只有法律部門，仲有特定嘅檢控權。即係响事件中，所謂有損失嘅受害人、調查同檢控集於一身，閂埋門自己搞晒，完全唔洗經警察或者政府檢控部門，只需要交代下就可以。

而且，當Fujitsu作為系統供應商唔承認系統有問題，英國郵政响隱瞞自己揀錯系統嘅情況下選擇相信Fujitsu，再交啲數據比程式人員「修正」，就等如連證據都有可能被修改。而Sub Postmasters更無可能提出任何證據去證明自己無穿櫃筒底。更可恥嘅係去到開始檢控嘅一刻，英國郵政嘅法律部門就會用監禁去脅迫班Sub Postmasters去認罪，承認做假帳罪然後還錢填返條去免去被控偷竊。結果好多人怕坐監而選擇認罪，傾家蕩產去歸還佢地根本無攞過嘅錢。

而劇集主角"Mr Bates"（Alan Bates）當年就係唔肯屈服，既唔承認偷竊，亦唔認做假帳，堅持係系統出問題，唔只打個人面對刑事官司，用咗十幾年，用埋自己嘅退休金去爭取社會關注，聯同其他受害者同家屬揾議員同政府官員幫手（其實更有人用自己嘅性命控訴），當中包括政府負責郵政同商務嘅官員。當年就係保守黨同自由民主黨聯合執政嘅初期，負責郵政事務嘅官員就係今天自由民主黨黨魁Ed Davey，當時Ed Davey明明有權去深入了解，但佢就選擇射波，話係英國郵政嘅內部事務，唔關政府事。呢堆書信近日因為劇集播出而公開，所以影響咗自由民主黨嘅民望。

至於點解連首相都要回應，原因係依家仲有幾百個受傷人當年嘅定罪仲未撒消，仍然處理當中，而負責嘅係咩人？繼續係英國郵政嘅法律部門！所以Rishi Sunak要親自回應，政府會受權司法部接手，覺得所有受害人嘅定罪都應該盡快處理（由法庭撒消）。

作者：Goodbye HK, Hello UK

▼Follow Goodbye HK, Hello UK
Facebook：https://www.facebook.com/goodbyehkhellouk
Website：https://www.goodbyehkhellouk.com/

【想在LINE TODAY刊登你的文章或影片，歡迎聯絡我們】