鍾意打卡嘅朋友有福啦！放假成日去cafe同博物館打卡打到悶？最近小編就發現左幾個最新露天popup打卡熱點想分享俾大家～由香港設計中心所主辦嘅本地旅遊項目「#ddHK設計 #香港地」，今年特別以「維港蛻變」作為概念，係銅鑼灣到中環路段放置左7組創意設計裝置！除左幫維港海濱新增左多個靚景點，大家仲可以去影相打卡再次體驗香港嘅美景！當中一定要睇長達80米嘅七彩空中漂浮河流、迷幻夜光拱門隧道「聲之穹蒼」，同以舞火龍驅走瘟疫為靈感嘅設計展首站，popup裝置開放日期比較短，部分只會維持到6月中，大家唔想錯過就要把握時間約埋朋友一齊去啦！

圖片來源：ddHK、IG@shanna_ma、yiuxjolly、leanne_szeto、aor.annie、onebite.design、ran.girlife｜撰文：Candice

「維港蛻變」打卡位1. 中環海濱活動空間《川流不熄》  80米長七彩空中漂浮河流

Popup展覽嘅所有藝術裝置都係由知名藝術加設計，當中最值得打卡嘅絕對係位於中環海濱嘅80米長七彩空中漂浮河流！呢個藝術裝置名叫《川流不熄》，係由來自美國知名設計工作室Poetic Kinetics之藝術家Patrick Shearn以其最具代表性的「Skynet」系列創作，以香港地標維港為創作靈感，由超過45,000條色帶製作動態懸空雕塑河流。

色帶隨風飄揚，望落去就好似一條川流不息嘅河流，個名真係改得超貼切！

係中環鬧市之中見到呢個咁七彩繽紛嘅動感裝置，又點可以唔去打卡影番幾張呢！無論係影全身定半身都一樣咁靚，配上背景嘅綠色草地，唔講真係以為去左外國打卡～想影得有feel d 建議可以近鏡低炒，做出向上望天嘅pose，感覺彷彿有種被七彩河流包圍嘅治癒感！

開放日期： 即日起至15/6/2021

開放時間：1pm-10pm （最後入場：9:30pm）

「維港蛻變」打卡位2. 銅鑼灣避風塘海濱《首》  融合傳統大坑舞火龍意象

作為「維港蛻變」整個設計展覽中火龍意象嘅開首，呢個作品係一組以高低錯落嘅#ddHK字體組成嘅設計裝置。龍首設計同大坑舞火龍傳統嘅結尾儀式大有淵源。

龍首由大坑坊眾福利會親自監製，手工超級講究，以珍珠草紮成龍首並插上火紅嘅長壽香，有香港本土特色之餘仲同岩岩介紹嘅結尾作品《川流不熄》首尾呼應添！

開放日期：即日起至20/6/2021

「維港蛻變」打卡位3. 灣仔海濱長廊《聲之穹蒼》  於迷幻夜光拱門隧道中聆聽專屬於香港的聲音

除左傳統意象嘅藝術裝置，展覽係灣仔亦設有科技感比較強嘅作品《聲之穹蒼》！呢個裝置超級特別，雖然日頭往落只係純白色，但一到夜晚就會變身成迷幻夜光拱門隧道～

《聲之穹蒼》係由澳洲多媒體設計團隊 ENESS， 以及本地設計及製作團隊雅卓創意一齊打造，大家只要穿梭係12道色彩繽紛充氣嘅「門窗」，就可以聽到源自香港不同角落嘅聲音，係五光十色嘅氛圍中感受灣仔嘅活力，配合夜景重新認識香港美。

夜晚影可以用縮時攝影，浪漫嘅粉色燈光配上維港夜景，真系岩曬情侶黎打卡留念！

開放日期：即日起至20/6/2021

開放時間：1pm-10pm （最後入場：9:30pm）

「維港蛻變」打卡位4.銅鑼灣避風塘海濱《#一齊一個人》 於公共空間享受獨處時光

黎到最後一個推介嘅打卡位，《#一齊一個人》聽落好抽象，其實呢件作品係由一系列「亭台」組成嘅公共家具！《#一齊一個人》以大坑舞火龍中嘅「龍珠」作為靈感，一個個圓珠設計望落超級可愛，配上橙色同天藍色就更加為公共空間增添一份生氣～

作品其實係由本地新銳建築同社會設計團隊「一口設計工作室」一齊設計，佢哋從觀察同研究中，反思公共設施嘅設計如何可以適應社會新常態，特別考慮到使用者於疫情期間想享受「一齊」但又「一個人」嘅時光。

由靜靜的嘅一個人坐，到一個人玩氹氹轉、音樂亭，每件家具裝置都經過精心設計考量，意在比大家無顧慮咁重新享受公共空間，互動感十足！

到左夜晚，「龍珠」仲會變成燈泡，配上維港景色超級浪漫，就算一個人坐係度靜靜休息下，停下海浪聲，感覺都好chill～

開放日期：即日起至20/6/2021

有興趣去打卡嘅朋友記得快D把握時間約朋友一齊去行下啦～