「我想訓練BB去到邊都瞓得到，可以嗎？」、「BB好似去邊都瞓得著，咁樣係好定唔好？」唔知你地對上述問題有咩睇法？ 正面對呢個問題嘅父母，一於聽下嬰幼兒睡眠顧問 Cheryl Chan分享！
每隔一段時間我都收到媽媽們問類似嘅問題，今日想同大家從嬰幼兒睡眠發展嘅角度分享下我嘅睇法。對於以上兩個提問，答案主要視乎兩個因素。
1. 月齡
初生階段嘅BB大多都較容易瞓得著，佢哋坐住BB車或者父母用孭帶孭住，搖下搖下咁，去到咩地方都好容易瞓到 ；去到大約一歲半後，小朋友嘅睡眠發展越嚟越成熟，都會較容易出街時候喺BB車瞓耐啲。
2. 外在環境敏感度
不得不否認，有啲BB天生對事物敏感度較低，相對冇咁容易受外在因素影響，所以佢哋未必需要特別多嘅配合，經已可好輕鬆喺BB車 / car seat / 孭帶度瞓好耐。 但好多BB對周遭嘅事物同聲音特別敏感，去到唔同地方，見到嘅畫面同聽到嘅聲音唔同咗，佢哋就比較難入睡同安睡。
做咗爸爸媽媽後，梗係想有社交生活，想去街就去街，想同朋友食飯就食飯，所以如果BB真係可以去到邊都瞓到，大人出街唔會影響佢哋嘅作息，咁就係完美啦！
不過，正如上述所講，能唔能夠做到都要睇唔同因素。行內冇一套特定方法訓練BB去到邊都瞓得到。始終喺穩定、平靜嘅環境下瞓覺，BB嘅睡眠質素係最好。出街就算瞓到，睡眠質素都會大打折扣。
當然， BB仔都可以出街，同埋應該要出下街嘅，所以父母應該喺出街同休息之間取得平衡。我一般建議父母可以安排有80%嘅日子，俾BB喺屋企有一致嘅作息環境，20%嘅日子帶BB出去睇下嘢，對嬰幼兒作息影響減到最低。
仲有一點大家要留意，如果你嘅小朋友經常一出街搖下搖下就秒睡，但係總係瞓吓醒下咁，就要留意小朋友平時嘅休息是否足夠，以致佢哋經常好快斷電好容易恰着。
嬰幼兒睡眠顧問 Cheryl Chan
從事教育工作多年，其後成為認可的嬰幼兒睡眠顧問，開設「Jovial Sleepers – 嬰幼兒睡眠諮詢」， 提供睡眠諮詢服務及為父母而設的網上嬰幼兒睡眠課程，協助父母解決嬰幼兒睡眠問題，提升小朋友和父母的睡眠質素。Cheryl相信「寶寶瞓得好，爸媽就少煩惱」，希望幫到更多家庭，讓大家都可以有覺好瞓。
Jovial Sleepers – 嬰幼兒睡眠諮詢 （IG: jovialsleepers）
育兒百科 ｜ 幼兒應該幾時戒奶嘴？
留言 0