最近正上映一套有關草間彌生嘅紀錄片—《點止草間彌生》，坦白說小編一開頭對草間彌生無咩特別好感，特別係對有密集恐懼症嘅朋友，佢嘅作品簡直睇到起雞皮啊！但睇完《點止草間彌生》之後，發現草間彌生背後經歷坎坷，令小編都開始敬重呢位藝術家，而以下呢10大「波點女王」草間彌生不可不知嘅經歷，粉絲們當然一定要知啦！
現成為世界上最暢銷女藝術家，更於2016年被《TIME》選為百大對世界具影響力人物之一嘅草間彌生，以下呢10大有關草間彌生不可不知嘅經歷，保證令大家對草間彌生刮目相看！
1. 從小患有精神病，以畫畫紓壓卻遭母親反對
草間彌生約於9歲已有會出現幻視、幻聽嘅「人格解體神經症」，喺佢眼中四周都存在巨大嘅網，網上嘅小圓點蔓延至全屋每個角落，經常令佢產生恐懼，但每每向母親求助，母親都唔相信佢所講嘅說話。草間彌生開始以畫畫抒發內心嘅恐懼，因此小時所畫嘅水彩畫都帶着黑暗、憂傷。
可惜母親反對草間彌生畫畫，每次見草間彌生畫畫，就會沒收佢嘅畫紙同畫具，但草間彌生並無放棄，而母親嘅舉動反造就草間彌生快速而準確嘅畫畫優勢，因為從小就要趕喺母親沒收畫作前完成作品。
2. 曾目擊父親出軌，自此對「性」產生恐懼
小時候草間彌生嘅父母關係唔好，有次母親懷疑丈夫有外遇，派草間彌生跟蹤父親。結果被草間彌生目擊到父親與其他女人有親密行為，當時草間彌生仍小，自始成為草間彌生對「性」嘅陰影及恐懼。
其後草間彌生自稱自己為無性戀者，日後即使與康奈爾拍拖，都係以「無性」為基礎。而且喺草間彌生嘅作品當中，有唔少都涉及「性愛」題材，如「陽具椅子」以及某些雕塑作品會以陽具作裝飾。
3. 紐約是她追求藝術的起點，卻受性別/種族歧視
小時候草間彌生已非常欣賞美國著名女畫家喬治亞‧歐姬芙，有次草間彌生毅然寫信比喱位女畫家，望指點迷津。結果喬治亞‧歐姬芙不單向草間彌生回信，而且對草間彌生嘅作品有感興趣，推薦佢到美國發展。
1957年草間彌生隻身前往紐約，將所有錢都花費於藝術材料上，只租一個簡陋嘅公寓，有時甚至無錢食飯。草間彌生憑天賦，漸漸於紐約成為小有名氣嘅藝術家，更有機會與當時知名嘅藝術家一同展出作品。
身為一個小女孩，並且經常穿着和服出席畫展嘅草間彌生當然受人注目，可惜受性別及種族影響，一直沒有機會舉辦個人展，未能扶搖直上，令草間彌生停滯不前。
4. 草間彌生未成名前，作品多次被世界知名藝術家抄襲
雖然草間彌生為人熟悉嘅作品都係以「圓點」或「網點」為主，但其實起初有好多草間彌生創作嘅作品，好多人都睇過，只係未必知原創係佢。
例如後人稱「軟雕塑先驅」藝術家歐登伯格(Claes Oldenburg)，其實起初係見到草間彌生用軟雕塑製作「陽具椅子」，先諗到將軟雕塑融入自己作品中。
除此之外，著名藝術家安迪．沃荷（Andy Warhol）曾於1966年展覽中，第一次用多張牆紙，絲網印刷複印母牛圖像，並貼滿展覽廳牆上。其實係抄襲草間彌生一次展覽中，同樣複印圖像貼滿展覽廳上嘅做法，當時Andy Warhol仲向草間彌生表示非常欣賞呢個作品。
被多次抄襲嘅草間彌生未有成名，但抄襲作品嘅藝術家都已被受關注，令佢深受打擊，曾多日自閉與公寓中，將所有門窗鎖好並用窗簾遮住，以免有人偷睇並抄襲佢嘅作品。
5. 「自行參加」威尼斯雙年展，展出個人作品《自戀庭園》
1966年，草間彌生於威尼斯雙年展中，喺未有受官方邀請下「自行參加」展出。佢買咗1500個塑膠球，並擺放於藝術館外，用2美元向觀眾「出售你的自戀」。
草間彌生將此名為《自戀庭園》，當時遭工作人員反對亦驅趕，草間彌生便會脫下衣服，展出緊身紅衣瞓喺數千個塑膠球中，進行行為藝術直至被趕走嘅最後一刻。後來《自戀庭園》終可以多個國家及展區正式展出，為人感動。
6. 激進不羈一面，以身體作行為藝術
草間彌生仲會進行裸體行為藝術，挑戰當時藝術界尺度。為咗惹人注目，以及表達世界對女藝術家限制嘅不滿，草間彌生曾有唔少大膽行為。
除咗以自己裸體融入作品外，1967年佢喺紐約 Black Gate劇院推出《自我消融》，邀請多個模特兒喺牆及赤裸裸嘅身體上，以螢光漆及圓形貼子進行創作，成個地方都係充滿圓點嘅男人，其後呢個「人體嘉年華」仲發生喺唔同地方。
7. 曾被抨擊為「松本市之恥」，於校友名單中剔除
草間彌生嘅行為藝術一直未停，喺多個社會議題上進行公共裸體活動以表不滿，其後更與多位藝術家合作，於紐約Walker Street嘅教堂進行一場「同性戀婚禮」。
此舉被大肆報導，更傳到日本，草間彌生出生地松本市居民認為佢嘅行為非常羞恥，同時家人感到非常憤怒，自此草間彌生被松本市唾棄，居民稱佢為「松本市之恥」，不斷批抨佢，更被小學從校友名單中剔除。
8. 一度自殺，幸好大難不死
雖然看似喺紐約發展得唔錯，但其實草間彌生嘅行為藝術都被唔少人批擊，後來漸漸更被藝術界遺忘。面對紐約藝術界以及日本嘅唾棄，有日草間彌生情緒低落，決定從窗一躍以下，幸好樓下有架單車經過晾住佢，令佢大難不死。
9. 好友隱瞞草間彌生入精神病院一事，助參加雙年展
草間彌生於日本一直有位好友賞識，喺草間彌生自願入住精神病院期間，好友幸好有機會參與1993年威尼斯雙年展事務，便向主辦單位隱瞞草間彌生入住精神病院一事，推薦佢參加威尼斯雙年展。
好友原可推薦3位日本藝術家參與展出，但佢堅持只推薦草間彌生一人，成功令草間彌生獨自代表日本參加威尼斯雙年展，日本政府更專門為佢設立主題館，自始在日本及國際藝術界備受重視。
10. 作品由75美元變700萬美元
現今草間彌生嘅作品都非常昂貴，但其實喺草間彌生剛到紐約參加小型展覽時，作品售價只係75美元，時至今日同一件作品已升價為逾700萬美元！草間彌生一直默默為藝術付出，終於得到認同！
唔知大家睇完草間彌生呢10大經歷，有無令大家更敬重呢位藝術家，又或者令原先討厭佢嘅朋友改觀呢？
圖片來源：FB@Yayoi Kusama、IG@warholpopart
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0