【搵食CONY】周末做乜好？梗係嘆返個阿根廷式Brunch！

好耐冇見！大家有冇掛住我呢？過完成個新年，搵食CONY終於開爐，又同大家見面啦。咩話？你地一早開咗爐，好想打我？咪住咪住，我知道好多讀者晨早就開咗爐， 就快忘記新年嘅快活日子，所以今日搵食CONY就帶大家去食個周末brunch。一瞓醒就去食好西，再慢慢chill足兩、三個鐘，簡直係人生一大樂事，我係咪好貼心呢？（笑）

近年有唔少高級餐廳都推出周末brunch menu，以半自助餐和飲品任飲作招徠，三、四百元蚊可以試到平時閒閒地要成千蚊先嘆到嘅高級餐飲體驗。好似阿根廷扒房Gaucho全新嘅brunch menu，提供任食6款指定前菜，配1款自選主菜，仲有任食3款指定甜品，都只係$350一位。如果想飲埋嘢，就可以選擇$450（任飲指定無酒精飲品）或$600（任飲指定酒精飲品）嘅package 。

阿根廷人出名食牛扒好講究，不過唔好以為今次個brunch menu得牛咁單調，當中嘅任食前菜令人驚喜，好似經典嘅Humita餡批和牛肉餡批，焗得恰到好處，不會太乾，而且size迷你，食一、兩件都唔會太飽太滯。

前菜又點會少得清新嘅菜式？檸檬汁醃海鱸（Seabass Ceviche）和檸檬汁醃吞拿魚（Tuna Ceviche）係另外兩款深得CONY歡心嘅前菜。Ceviche係南美洲常用的烹調方式，即是以檸檬汁醃「熟」魚生。餐廳將海鱸與西柚、粟米和芥末配搭，令整道菜提鮮不少，又將牛油果蓉和香草與吞拿魚混合，變得細滑又惹味。其他仲有炆牛脊（Braised Beef Back Ribs）同西瓜沙律兩款前菜，而以上六款都可以任意encore。

至於主菜方面可以五選一，CONY今次冇試佢地嘅招牌牛扒，反而試咗海鱸（Oven-Baked Sea Bass）。冇諗過一間扒房整魚都有一手，海鱸焗得剛好，皮脆而肉汁豐厚，伴以多款番茄，酸甜開胃，不過份量唔多，男仔可能唔夠飽。兩位朋友就分別嗌咗兩款招牌牛扒Bife De Ancho和Bife de Chorizo，有沙律和薯條做配菜。

最後甜品方面，可以任食Mango and Passion Fruit Mess、Chocolate Brownie和招牌Dulce de Leche Cheesecake。可能食前面嘅菜式太飽，食芝士蛋糕同朱古力布朗尼都覺得有點滯，尤其芝士蛋糕焦糖味重，都幾甜，未必啱唔喜歡太甜嘅朋友。Mango and Passion Fruit Mess雖然好似好普通，但可以輕輕清新味蕾。

Gaucho brunch menu由逢星期六、日，12點至3點半供應，可以慢慢食足3個半鐘之餘，仲可以任食多款招牌菜式，係時候慰勞下自己平日咁辛勞工作啦！

Gaucho Steak Restaurant

地址：中環皇后大道中31號陸海通大廈5樓

查詢：2386 8090