急性肺炎曾入ICU賢妻監控揭歐陽震華頂級養命法

六年前的年初二，歐陽震華（Bobby）開P暢飲狂歡後，落錯隔嗆喉導致急性肺炎，昏迷入院搶救，當年令其妻、澳門前賭王傅老榕孫女傅潔嫻甚為擔心，差點成為植物人的Bobby福大命大，康復後未有戒酒，不過在賢妻的嚴密監控下，要堅守有節制的識飲識食生活。
死過翻生的Bobby深覺命仔與老婆最緊要，傅潔嫻亦為老公健康著想，不時進補調理身體，家中冬蟲草與燕窩長食長有，Bobby更以乾瑤柱作為零食，識得滋陰補腎，再加上冇工作壓力，凡事歎慢板，被喻為頂級養命法。日前夫婦二人去跑馬地睇幫襯多年的名中醫，心廣體胖的Bobby拎走一大樽中藥粉，與老婆趕下場去打邊爐，繼續享樂人生。

撰文：東方新地 | 圖片：新傳媒圖片 | 編輯：Chloe

歐陽震華死過翻生

歐陽震華（Bobby）天生一副福相，唔靚仔但憑鬼馬性格及出色演技在電視圈走紅幾十年，感情路上簡直如中六合彩，太太傅潔嫻是澳門第二代賭王傅老榕的孫女，傅老榕家族為香港富麗華酒店創辦人，酒店1985年上市，家族持有資產約80億港元。 Bobby96年在加拿大結婚，98年才公開婚訊，因為傅潔嫻是豪門後人，所以務必低調。

日前歐陽震華與太太傅潔嫻現身跑馬地一間相熟中醫館,據知二人幫襯已逾十年,與店內的中醫師非常稔熟。

滋陰歎蟲草燕窩

歐陽震華夫婦平時愛以冬蟲夏草及燕窩來補身，這日睇完中醫傅潔嫻在店內選購蔘茸海味，Bobby突然推開太太狀甚心急。

大難後繼續飯敍

13年Bobby在友人家舉行開年P，無酒不歡的他當晚喝過大量酒，凌晨時分突然昏迷被送入ICU，經搶救十二小時度過危險期，令太太傅潔嫻嚇餐飽，Bobby出院後曾三度承諾︰「以後食嘢會檢點啲，酒飲少啲。」不過好快就繼續飯照食、酒照飲。據知情者透露：「當年飲完酒出事咁大鑊，Bobby同Rosanna（傅潔嫻）曾經有段時間好深閨，不過兩公婆都流住酒精嘅血，好快又出嚟同朋友飯敍開P，佢哋習慣咗以酒會友，當然唔會戒酒啦！係冇以前玩得咁盡，以前閒閒哋飲通宵，依家唔會喇，佢哋會畀足夠時間自己休息同回氣，同埋keep住睇中醫調理身體，有Rosanna監督住，Bobby 已經節制咗好多，就算幾鍾意食嘅嘢，如果食多無益，Rosanna亦唔會畀佢食過量，不過Bobby真係好為食，有時拍劇開工趁老婆唔喺身邊，佢都會暴飲暴食。」

乾瑤柱當零食

原來Bobby急住行去拎乾瑤柱食，乾瑤柱被列為「海八珍」之一，有滋陰補血、歸肝、腎、脾經之用；含豐富蛋白質、磷酸鈣及維他命A、B及D等，Bobby揀零食都富貴過人。

Bobby與太太住在位於白建時道的豪宅，私下又是三間食肆的老闆，Bobby 近年的養生生活足以媲美富豪級，其頂級養生法同燒錢無分別。知情者透露：「Rosanna系出名門，好細個已經成日食燕窩，仲要食最貴最頂級嘅血燕，真係唔係人人食得起，因為Bobby當年係急性肺炎，血燕就係可以補肺養陰、止肺虛性咳嗽、減少肺氣病變，依家兩公婆一齊食，屋企定時都會入定貨。另外Bobby亦日日食冬蟲夏草，唔係講笑，真係當飯咁食，個個月花費喺補品食材方面都過十萬。」

買樽儲存藥粉

今時今日，服用中藥可由藥粉代替，Bobby對製作藥粉的銀色機器非常好奇，他更跑到隔籬雜貨店買玻璃樽，用來存放自己的藥粉，非常環保。

日食冬蟲草養生

Bobby養生好揼本，所食的冬蟲夏草動輒三萬元一両，每両約食十日，平均每月豪花近十萬，年前他曾被影到去掃冬蟲夏草，至於食療則交由太太炮製，賢妻傅潔嫻持家有道，每日都吩咐家中傭人燉湯、煮飯或焗水讓Bobby服用。Bobby亦曾經直認不諱近年主打食冬蟲夏草養生，因為冬蟲夏草有滋肺陰補腎陽、有提高免疫力功效。除了專注在食療上，Bobby在生活態度上亦有所改變，他曾說：「人可以好偉大，又可以好渺小，真係要喺有知覺嗰陣，做多啲有意義嘅事，仲要乜嘢都要玩多啲，今次我真係體會到。」

本來已經生活富泰無憂的Bobby，近年更加刻意減產，堅持「半年休息，半年工作」，而近年每次為無綫拍劇，都必定在開劇前約法三章，每日開工要有十粒鐘休息。放慢腳步享受人生的Bobby，多了時間陪愛妻周圍去，二人膝下無兒女，過二人世界開心又快活。自17年拍完無綫劇《誇世代》，近年Bobby只接工時短自由度高的工作，不時返國內登台接商場騷，太太傅潔嫻亦樂做跟得夫人。

冇見一排，Bobby身形膨脹不少，遠睇有幾分似秦煌，雖然他曾表示自己冇三高（高血壓、高血脂、高血糖），但體重應該超晒標。

發福現身跑馬地

日前Bobby與太太傅潔嫻以全黑夫婦裝現身跑馬地，前往幫襯多年的名中醫師，經醫師把脈診治後，二人在店內閒逛等執藥，傅潔嫻在揀選蔘茸海味之時，Bobby行動迅速走去拎乾瑤柱即場放入口當零食，現場所見，他食過翻尋味拎完再拎，最後可能食到自己都覺唔好意思，索性買走一大包返屋企再慢慢食。據知Bobby今次去睇中醫並非有病求醫，只是定期調理，故醫師開了藥粉給他每日食用，Bobby亦好環保，隨即走到隔籬雜貨店買了一個大玻璃樽存放藥粉。

近月養精蓄銳的Bobby，在太太悉心照料下，明顯心廣體胖，睇完中醫二人即趕下場，駕車去銅鑼灣會友人打邊爐。做人及時行樂係好，現年58歲的Bobby切記六年前就係因為太盡興而出事，小酒可以怡情，千祈唔好再暴飲暴食，令老婆擔心喇！