鬆軟輕盈得像空氣嘅法式經典甜品 soufflé 梳乎厘，於食譜、溫度、時間嘅控制一定要達至平衡與完美，先可以做到一個外形與質感相稱嘅成品。中環置地文華東方酒店內、走法式小酒館路線嘅 SOMM係唔少 foodie 心目中嘅 best kept secret，餐廳嘅早餐、咖啡、麵包均是驚喜之作。
其中朱古力梳乎厘更加係熟客必點甜品，用上 85% Abinao 黑朱古力，混合朱古力粉、蛋白及牛奶，烘焗 8 分鐘便即上桌，梳乎厘焗起提升嘅高度令內裏充滿空氣，每一口也是濕潤而鬆軟。
而中間仲有暖笠笠嘅流心朱古力漿，融化嘅質感與溫度絕對係感動味蕾，黑朱古力嘅味道唔會太甜，食完一整個都也不覺膩。另附上自家製嘅可可豆雪葩，帶來冰涼滑溜嘅可可滋味，難怪被譽為酒店餐廳內嘅名物。SOMM 每逢周末及公眾假期推出嘅 SOMMkind of Brunch 早午餐，便有這款 soufflé 甜品供應。
早午餐走精緻高雅路線，沒有老土嘅自助餐桌，所有食物及菜式均奉到客人餐桌，包括共享麵包盒、前菜、自選主菜及甜品各一款。自家製麵包盒定期轉換款式，包括酸種麵包、橄欖車厘茄香草麵包、牛角包配法國牛油及果醬等，共享前菜則有帝王蟹紫蘇大根卷、煙熏塔斯馬尼亞三文魚蟹籽撻等。
自選主菜包括炭燒鵪鶉配青豌豆、西洋菜、檸檬及意大利乳酪；海鱒魚伴白蘆筍，佐以水果番茄餡料及法式龍蒿醬，至於甜品，朱古力梳乎厘以外，另有熱香餅配烤核桃、沖繩糖漿及青檸汁，是清新口感之選。
SOMMkind of Brunch 於周末或公眾假期 11am-2:30pm 供應，每位 $768 包括 90 分鐘無限暢飲氣泡飲、時令雞尾酒、果汁、咖啡及茶，另加 $100 可額外選配無限暢飲指定香檳、清酒、白酒及紅酒。
地址：中環置地文華東方酒店 7 樓
電話：2132 0055
留言 0