最近係FB成日見到呢間餐廳賣廣告，又見到好多人留言話好好食，所以我老遠都叫朋友同我去大埔試下佢地個法國晚餐。

📸 Instagram - https://www.instagram.com/mr.travelgenius/

環境裝修幾靚，不過比想像中擠迫，檯間密度同茶餐廳一樣咁密，香港地價貴，無計啦。
我地兩個人, 分別叫左一個HK$688嘅晚餐，再叫左一個HK$1288嘅海鮮餐，我地SHARE一齊試下，睇下究竟到底係咪真係好高質。

首先餐飲我朋友叫左一杯啤酒，真係好唔適合打卡。
我叫呢杯就勁啦，成個汽泡彈係杯酒上面，由於係職員幫我揀一杯最誇最適合打卡影相，所以我唔係好記得佢叫咩名，但佢個汽泡蛋一吉佢就爆然後四圍都係煙，好有氣氛。

味道飲落甜甜地好易入口嘅酒，唔錯。

然後上左688果個餐嘅沙律，真係得菜……同好少配料，好大對比。 味道正常，無驚喜，就係一堆羅馬生菜配黑醋，正常。

因為另一份貴價餐有煙三文魚做配料，賣相真係靚好多，果然真係一分錢一分貨。

裝飾用的食用花，真係好靚。
有煙三文魚配搭，D菜變得好食D。

之後上左兩個法式濃湯，一個係南瓜湯，一個係牛肝菌湯。 我覺得個南瓜湯應該係屬於688個餐，因為牛肝菌果個又係靚好多。

南瓜湯，正常，無驚喜，而佢一大堆伴碟嘅食用花&果仁係唔知做咩，同個湯有咩關係，我試過撈埋一齊飲，但唔見得有好飲左，純裝飾嗎? 係幾靚嘅，但如果兩者結合係有驚喜嘅話會仲好仲實際。

牛肝菌湯好濃菇味，大愛，不過同我係澳門食過一間米芝蓮三星法國菜相比，佢都係稀左d，不過味道係唔差，我覺得都幾好飲。

跟住落黎係一片魚子醬多士，終於有野係兩個餐都一模一樣架啦！

大家有無留意我頭先果個湯先食左一塊蒜蓉包？
原來呢個魚子醬多士又係一片蒜蓉包做底，蓋上魚子醬。

我個人覺得佢好咸，因為蒜蓉包已經有味，再加上魚子醬其實係浪費左個魚子醬，所以我覺得佢用返普通法包多士做底就ok，無需要用蒜蓉多士做底，兩個味道都太搶。
但魚子醬係好味嘅，咸咸地好鮮。

之後就上左兩個餐前小食，首先係鵝肝醬批。

又係好多食用花，真係每一碟都出現lol。

我同朋友share一人一半，好夠，因為好大舊鵝肝，食落好漏，不過好好食，呢個無出事，只係怪佢太邪惡，好驚肥 XD！

而朋友個海鮮餐嘅小食係魚生，我唔太記得佢係咩魚，食落無咩特別，連味道係點都無乜印象，好似係酸酸地的醋味，我覺得還好。

到主菜啦，主菜有4款可以自選，都幾好，我HK$688個餐就揀左燒豬鞍扒，貪佢應該夠飽肚。

擺盤就真係擺得好靚，每個唔同角度都好好影。
不過擺盤有兩塊好似呢士咁嘅裝飾品(黃綠色果兩塊)，係唔食得嘅，純粹為左靚。
我就覺得佢唔加好過加，因為呢塊野點洗? 應該唔會用重吧?

佢插左條ROSEMARY落個法式青瓜矮瓜批度，賣相幾靚，成棵樹咁。
但食落凍嘅，無咩調味，好清淡。

而豬鞍扒嘅質地就係………………..好鞋，唔知係咪燒得太熟呢，咬都唔係太咬得開，正常豬鞍係肥瘦均勻好彈牙，但佢真係無果種質地，下次真係要控制好D火喉了。

至於1288果個海鮮餐，就係帶子忌廉薏米飯，個碟畫左好多花花圖案係度，好用心，但靚唔靚就真係見人見志，我覺得變左好中式餐具。 有時LESS IS MORE，畫個花落去，如果對碟食物無幫助的話，其實可以用D心機煎好塊豬鞍先。

帶子好嫩滑，個薏米飯取代米飯成為主食好有驚喜！
首先食薏米唔會高糖份掛? 應該唔會好肥，食左都無罪惡感！
同埋口感好彈牙，同食意大利米都好唔同，真係好好食呢個，食到一粒薏米都無得剩！

最後上甜品，688餐係得到一碟TIRAMISU………………. 好細件嘅切餅，賣相唔太吸引，但食落都OK。

我只可以話真係一分錢一分貨，差一倍價錢所有野都差好多，呢個就算唔好食都起碼靚！有好多煙呀~~~~

UMUM…………………. 好似件事差好遠，我見人地果個好靚，不過算，海膽撈雪糕我幻想唔到係咩味，可能TIRAMISU仲好食，海膽撈雪糕究竟係咩味，我真係諗唔到，哈哈。
總結黎講，整體味道都有7分，最主要D分係扣左落個豬鞍度，我真係食剩3分1咬唔到落去擺低就算。

但最好食係個鵝肝批&薏米飯，好唔錯！ 中規中距係個魚子醬包&湯，唔差，但可以再做好D。

如果真係黎食，我建議食最貴果個HK$1288餐吧，或者散叫薏米飯，真係好食。

-----------------------------

L'AMOUR 

地址：大埔大埔太和路15號太和中心地下38號舖

電話號碼：98884532

-----------------------------

➥? 訂閱頻道－ https://www.youtube.com/c/窮遊達人MrTravelGenius?sub_confirmation=1

📝 窮遊達人 - 官方網站

https://www.timbeelo.shop/

足本節目 ⏬

Full Version ⏬

Facebook/YouTube 搜尋Search

🔥窮遊達人 Mr. Travel Genius🔥

🎬 YouTube Channel -https://www.youtube.com/c/%E7%AA%AE%E9%81%8A%E9%81%94%E4%BA%BAMrTravelGenius/featured

🅿️ Facebook - https://www.facebook.com/mr.travelgenius/