最近好多網民都會留言話我出文賣廣告，其實真係好委屈，首先我LINE TODAY 無文章費收唔在講，餐廳亦都只係通融比我拍攝採訪，有時都唔係好明點解D網民咁鍾意話人收錢賣廣告，有錢收我都想，但我只係將我覺得欣賞嘅店家分享比大家，如果有睇開窮遊達人日本篇，應該都知道我間間食店都會事先詢問採訪先會去，務求店家合作唔好趕我走，所以先可以拍得到咁靚。

今次我私心想介紹一間已經有7年歷史嘅CAFE，不過我都係近期先發現佢地，但原來係香港CAFE界已經享負盛名。

不過佢地吸引我嘅唔係CAFE，而係佢地店舖嘅藝術感，一杯一碟甚麼一草一木都係藝術。

佢就係「Mum's not home 媽不在家」。

如果你睇到呢度想講：扯~~~~我去過十萬次啦，唔駛你介紹啦。

OK FINE！

咁不如等我講解下佢地鮮為人知嘅店內特色啦！

店主CHOW係一位修讀時裝設計嘅時尚藝術家，畢業後完成左澳洲Working Holiday之後，返到香港在機緣巧合下，開左呢一間上樓時裝店，再陰差陽錯下，變成左一間時裝蛋糕店。

呢一切原來都係佢地當初意料之外。

店主之一的CHOW，自開業以來，每日都會係店內現場繪畫，幫客人訂製個人特色畫像，令店內充滿藝術氛圍。

到處都係CHOW的畫作，令到店面非常有個人特色同藝術感。

人像畫當中佢採用左好多唔合常理嘅用色、佈局，例如藍色鼻子，超紅的腮，每一個細節都有著CHOW嘅個人風格，從而都好影響佢地往後推出嘅食品賣相！

講返佢嘅發展史，CHOW同另一店主MAKUI當年開店之後，就成日出國入貨做買手，搜羅好多古怪商品返黎，到而家都一樣有好多有趣時裝古著飾物，甚至有好多擺設，入到去有滿滿嘅中東色彩尋寶FEEL。

圖中更是CHOW同歌手鄧小巧的一次CROSSOVER合作照片，充滿玩味！

CHOW除左入貨，都有自己設計圖案布料同時裝單品，產品包括服裝、布袋、胸章等等小物，好有獨特性。

所有商品都係自家小量生產，出面係買唔到架！

大家有興趣都不妨上黎試下。

當初佢地係外國搜羅到好多特色茶葉，放係時裝雜貨店內發售，令到往後店內都推出左茶飲系列。

話說開店初期，當時有好多記者傳媒仲好用心咁，用佢地嘅茶菜製作左食物來報導佢地嘅茶業產品，令「媽不在家」被人誤以為係一間有蛋糕甜品食嘅餐廳，由於之後太多客人黎到都話想食佢地嘅甜品，甚至投訴佢地點解無食物賣，令店主非常困擾。

於是另一位店主MAKUI，把心一橫，將佢係澳洲Working Holiday學到嘅製作芝士蛋糕技術，嘗試運用自家發售嘅茶葉於芝士蛋糕上，加上CHOW嘅藝術觸覺，引發到店內發售好多反傳統、古靈精怪，但充滿玩味嘅食物！

由於MAKUI唔想我介紹佢地嘅芝士蛋糕(原因不明)，但我又好想介紹一下，因為賣相真係好非一般！

所以我只係點左兩款少少地介紹下！

其中一款藍色芝士蛋糕，賣相果然相當奇怪。有一種凡高「繁星夜」嘅感覺，原來佢係「藍人秘蛋」蝶豆花青檸芝士蛋糕。

味道有強烈的CREAM CHEESE味同少少青檸味，蝶豆花味唔重，不過顏色就非常強勁！

口感較綿稠，咬落去好鬆軟，幾特別！由於佢唔係正宗廚師出身，無一個廚師包袱，所以創作力量同幻想都有別於一般芝士蛋糕，好有驚喜！

另一款當店最受歡迎蛋糕「瑪莎拉蛋」，係以瑪莎拉茶葉製作，茶香味好重，相對芝士味無咁濃，易入口，咬落有茶葉碎片口感，好特意！

而最近佢地仲推出左網店，可以ONLINE訂購完整一個的芝士蛋糕！

https://www.mumsnothome.com/

網站上面嘅圖令我更驚訝！

全部每一個都色彩斑爛，有別於一般蛋糕店出品，充滿藝術氣息，挑戰味覺更加挑戰視覺！

然後介紹一下茶飲吧！都係當店受歡迎飲品之一！

玫莓汁。

有玫瑰花茶+紅莓果汁混合而成，口感好清新！

但不得不提佢地使用嘅器皿，並唔係為左刻意賣弄造型而用上呢一款金屬碗。

店主解釋當初係摩洛哥採購時買左好多呢個碗返黎改裝成燈罩發售，但由於貨入太多，又整唔到咁多支燈，最後就地取材用左呢一隻咁有異國風情嘅鋁碗做成當店特色餐具啦！

店內裝潢，都係由曾任職VM廚窗設計的MAKUI親自打理。

店內到處都係打卡位，雖然身處油麻地，但仿佛自己好似去左中南美洲國家咁，令人有一種短暫脫離現實嘅感覺！

如果大家想工作繁忙下休息一下，黎到「媽不在家」應該會感覺到好舒暢，因為整個店比我嘅感覺都唔似香港，我真係好喜歡呢度呀！

PS: 最低消費HK$100，基本上一杯飲品+一件蛋糕剛剛好。

「媽不在家」

地址：油麻地上海街302號1樓

查詢：97705760

-----------------------------

➥ 【窮遊達人】訂閱頻道－ https://www.youtube.com/c/窮遊達人MrTravelGenius?sub_confirmation=1

📝 TIMBEE LO shop - 官方時尚精品購物網站

https://www.timbeelo.shop/

-- YouTube最新影片 --

足本節目 ⏬

Full Version ⏬

Facebook/YouTube 搜尋Search

🔥窮遊達人 Mr. Travel Genius🔥

🎬 YouTube Channel -https://www.youtube.com/c/%E7%AA%AE%E9%81%8A%E9%81%94%E4%BA%BAMrTravelGenius/featured

🅿️ Facebook - https://www.facebook.com/mr.travelgenius/

📸 Instagram - https://www.instagram.com/mr.travelgenius/