傳統豆腐含豐富鈣質及蛋白質等營養，加上可塑性高，老少咸宜，是不少「煮」人愛用食材之一，然而，消費者委員會剛公布早前測試的預先及非預先包裝豆腐樣本，結果發現，大部分樣本含鈣量都偏低，當中又以非預先包裝而用熟石膏製作的豆腐含鈣量較高。而預先包裝豆腐中更有不少標籤與豆腐營養含量大有出入，所以話，有時間，不如自己動手做，起碼用料、含鈣量及過程都有保證囉！
製作豆腐一般會用到鹽滷或食用熟石膏，兩者都係天然礦物質，而熟石膏屬一種中藥材，含鈣之餘，亦具緩脾益氣、生津止渴等功效。
自己整豆腐好麻煩？其實都唔算！早前《我係敢煮》曾教大家以食用熟石膏自製豆花，而豆腐只係將豆花打碎再壓出水分而成。做法是先將黃豆洗淨浸過夜（當然，亦可朝早浸幾個鐘，下午才動手煮；亦可晚上睡前浸，第二朝一早做完放雪櫃，晚上才用來炮製晚餐），隔水後放入攪拌機（或講究到用石磨都得）打爛後隔渣成豆漿，將豆漿煮滾，與熟石膏粉開成的水撞成豆花。但，如果屋企無攪拌機或石磨，都有個快捷方法，就係直接買樽無糖豆漿煮滾，撞入同水撈勻的熟石膏粉水之後，用濕布蓋住直至凝固，期間，切忌手多多，千祈咪「攪」就好。
這時，如果有紗布或豆腐巾或棉布，就要用水浸濕，放到豆腐模入面（無模具都不怕，可以用細孔筲箕取代，甚至用不銹鋼筲箕都得，只是形狀會各有不同）。之後將凝固好的豆花打碎（想豆腐嫩一點、水潤一點則不要打得太碎），放入布內，將布摺起包緊豆花，上面壓上重物，大約20至30分鐘左右，觀察仲有冇水流出來，愈來愈少代表差不多，取出，可直接入饌或浸冰水降溫後存放入雪櫃，不過，大部分愛自製豆腐的「煮」人都建議盡快食用，這樣才能品嘗到新鮮豆腐的濃郁豆香與最佳風味。
即製新鮮豆腐可以炮製成開胃小菜或涼菜，好似不少人愛吃的皮蛋豆腐，還可以加入瑤柱及肉碎炮製成蒸豆腐，老人家同小朋友都可以用來撈飯。
菜式：皮蛋涼拌豆腐
材料：
自製豆腐 適量
皮蛋 2隻
蒜蓉 少許
葱 1棵
油 少許
麻油 1茶匙
鹽 少許
蠔油 1湯匙
凍滾水 2湯匙
芫荽 適量
做法：
1. 豆腐置碟內；芫荽切碎；青葱切粒、葱白切片，皮蛋去殼用滾水稍灼後切件放在豆腐面。
2. 燒熱油爆香葱白，下調味煮滾後下青葱拌勻，淋在排好的皮蛋豆腐上，放入芫荽碎即成。
菜式：瑤柱肉碎蒸豆腐
材料：（適量或因應個人喜好而增刪）
自製豆腐、瑤柱、肉碎、生抽、老抽、糖、粟粉、油、鹽、凍滾水、葱花
做法：
1. 瑤柱洗淨浸軟、葱切碎。
2. 肉碎先以生抽、老抽、糖、粟粉、鹽及油拌勻稍醃。
3. 豆腐切片放碟上，將肉碎鋪在豆腐面，放上浸腍手撕的瑤柱絲，滾水蒸15分鐘，灑點葱花即成。