時代唔同，有唔少人都覺得結婚只係一張證明，別無其他意義；於是，兩個人只係搵個地方住埋一齊，過住「無名有實」的同居生活。事實上，筆者同幾位現在/曾經有過類似同居生活的朋友傾過，都話如果真係要同居，以下的事情千祈咪亂做！
同居大忌1：實行共產制 - 開聯名戶口及買樓
「共產制」呢個字好broad，最基本的例子包括一齊買樓（別係聯名買）同開聯名戶口。搞共產，關係和睦的時候問題不大；但當關係出現變卦，事情就唔係其中一方搬走就可以解決咁簡單，因為同居關係並無婚姻關係在法律上所賦予的權利同規則，要處理極耗心力時間。
筆者自己的第一大戀愛法則係，要財政獨立，盡量唔好同對方有金錢瓜葛，就算有幾大的錢銀煩惱，都寧願外求。對方一日未係老公、老婆，都唔會麻煩對方，無謂令錢銀成為日後爭拗的導火線又或者「唔分得手」的原因。
同居大忌2：跟對方屋企人同居
朋友J同女朋友一齊十年，已經準備談婚論嫁。男方太孝順，堅持要同媽住；女方太天真，結婚前半年到男家屋企玩「婚前同居練習」，結果未來奶奶堅決「彈鐘」，分手收場，連預先訂好的酒席都要取消。
如果對方堅持與家人同居，明知婆媳不和而不讓步，那是他尚未夠愛你。結婚是兩個家庭的事；但同居只是兩口子的事。婚前選擇同居，不止因為重視二人世界，也要避免對方家人破壞兩口子感情。朋友J的例子，正正因為兩人未結婚，所以寧願聽媽媽話分手收場；假如婚後才跟對方屋企人同居，斷估都會想盡辦法磨合解決，未至於讓10年情流逝。
同居大忌3：俾鎖匙家人
私隱！私隱！私隱！太重要，講三次都嫌少。
無論你同家人關係有幾好，或者只想家人幫你執屋，比俾鎖匙屋企人都係一個大忌。人實在有太多生活習慣，唔會想顯露俾唔熟的人知道，更加唔會想俾人指指點點。何況你們只是同居情侶關係，不是完全融入了對方家庭，哪有藉口配鎖匙俾家人？
又或者好似啲劇集咁，當你同對方親熱時，突然「外母」殺到！因為咁而成日提心吊膽，同居又有咩意義呢？
同居大忌4：生小朋友
無可否認，一紙婚書始終有佢保護家庭完完整整的能力。如果你想同居、唔結婚，又想生小朋友的話，請問自己一個問題：你想BB將來叫你另一半做做爸爸定Uncle？
如果你真心為個小朋友身心健康著想，希望佢可以在一個健全的環境成長，真心建議，一係結婚，一係繼續同居過二人世界好了。
同居大忌5：以為同居可幫愛情保鮮
Case by case，同居者未必會同意呢一點。不過經驗之談，唔少人同居得耐，個人的生活細節已經表露無遺，無曬想像空間，又或者只剩低對對方的不滿。漸漸，對方由愛人變成家人，完全失去心跳感覺。你有你淘寶，對方有對方打機。
筆者的朋友同中學時期開始一齊的女朋友買樓同居，但遲遲唔結婚。兩個人相處太耐，太習慣對方的存在，就算同居都只係各自修行，結果男方在職場遇上第三者，賣樓分手收場。
有人覺得，婚姻將段關係責任化太死板，同居可以令大家都有心去為關係保鮮。筆者覺得絕對唔Work。想為愛情保鮮，從來唔係靠形式，而係靠心態。假如想用同居試婚，就要通過這 6 件事，證明你們可以過一輩子！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**
留言 0