電子支付服務日漸普遍，就連港鐵都即將引入附QR code系統嘅入閘機！
消息指，今日（15日）港鐵正式批出合約畀 AlipayHK（支付寶香港）喺港鐵出入閘機提供二維碼(「QR Code」)付費乘車服務 ，為乘客提供多一種支付車費選擇。AlipayHK指，有關服務將於2020年推出，到時乘客掃QR Code搭港鐵，出入閘過程少於0.4秒。
AlipayHK表示有關服務將於2020年為全港91個港鐵站（除咗機鐵站）提供QRcode收費系統，預料2020年中起全線約有一千部閘機可利用QR Code付費。呢個QRcode收費系統將可支援雙離線支付操作，即使流動網絡訊號較弱或冇網絡下，都能夠正常完成交易。
港鐵今次採用「先乘搭後付費」概念，當乘客到達目的地出閘後，系統先會從乘客嘅電子錢包中扣數。
雖然以QRcode付費同八達通收費相同，但預料推出初期未能享有港鐵其他八達通優惠，例如每程百分之三車費回贈、轉乘優惠、特惠站優惠及早晨折扣優惠等；至於政府推出嘅公共交通費用補貼計劃，就未知會唔會涵蓋二維碼繳費。
不過，港鐵話QRcode入閘機嘅設計同實際操作尚待落實！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0