本地飲食業受疫症侵襲變得死氣沉沉，但其實今年亦有不少特色餐廳悄悄開業。好似喺Rosewood Hotel於5月新開嘅印度餐廳「CHAAT」，由印度總廚以大膽創新方式，重新演繹印度不同地區的傳統街頭小食，等你可以一餐食勻全印度嘅特色美食。除咗堂食以外，餐廳更有不少菜式適合外賣，即使翻熱過後都不減滋味。
「CHAAT」喺印度文有「舔」嘅意思，寓意客人會將碟上所有食物一滴不剩咁送進肚裡。咁有信心，或多或少都因為餐廳總廚Manav Tuli嘅實力及豐富經驗。來自印度嘅Manav，曾喺印度不同地區嘅頂級廚房工作，因此對各種印度菜風味瞭如指掌。後來佢因緣際遇去到倫敦工作，更喺2019年帶領位於倫敦嘅餐廳Tamarind，成為當地首批獲得米芝蓮殊榮嘅印度餐館之一。
今年嚟到香港掌舵CHAAT，佢將印度各地區風味集結，由中部各州、孟買海岸、北部嘅旁遮普（Punjab）和南部嘅喀拉拉邦（Kerala）等美食一應俱全，而印度嘅街頭美食文化聞名於世，總廚就將各款傳統小食革新，變成一道道精緻前菜。
脆扁豆配香甜酸辣醬（Raj Kachori）$88：呢款形狀好似UFO嘅素菜小食，起源於印度北部，被譽為「印度街頭美食之王」。佢嘅外層酥脆，裡面塞滿了豌豆和小扁豆等餡料，配埋集香甜酸辣於一身嘅醬汁，相當惹味。 羊肉餡角（Lamb Samosa）$128：Samosa係著名嘅印度小食，傳統餡料為薯仔和蔬菜，而Manav就改為釀入羊肉蓉，口味更加濃郁，配上香脆脆筒，口感層次豐富。至於印度菜必食嘅Tandoor燒烤，呢度都做得出色。傳統Tandoor係由建於地上嘅泥爐燒烤，香港餐廳當然冇可能做到，所以餐廳特製咗3部Tandoor烤爐，以不銹鋼製成，但同樣能產生獨有焦香和煙燻味道。
食客可以從餐廳嘅透明玻璃窺探廚房內的Tandoor烤爐。 車打芝士辣椒印度烤餅（Mature Cheddar & Chilli Naan）$78：印度美食中，CONY最愛Naan。以Tandoor烤製而成嘅麵包風味與別不同，餐廳再加埋車打芝士製成麵糰，鹹香十足。 烤羊架（Lamp Chops）$398：以Tandoor烤製嘅羊架係另一樣印度菜必食嘅菜式，外皮香脆，裡面啱啱好熟，而肉質仲好嫩滑多汁，加埋滿滿開心果碎和薄荷酸辣醬，剛好中和膩感。 芥末大蝦（Sarson Prawn）$395：採用孟加拉灣野生大蝦炮製，燒完都仲有手心咁大隻，肉質爽口彈牙。 賈朗達爾薄餅（Paper paratha of Jalandhar）$78
菠菜、新鮮印度芝士及蒜頭（Palak Paneer ）$148：印度芝士味道濃郁，但比西方芝士冇咁鹹，而且口感更細滑，經tandoor爐燒烤會有種獨特焦香。總廚Manav一向忠於家鄉嘅味道，再以現代手法重新演繹。除咗經典街頭小食和燒烤菜式，佢更設計多款慢煮菜式，好似蓋上酥皮的「香料羊肉飯」，加入芥末、椰子製成嘅大蝦咖喱，仲有別具印度風情嘅芒果雪條和檸檬撻。
香料羊肉飯（Lamb Dum Biryani）$228：以陳年印度米、藏紅花及多種香料製成，奉上時有專人為你打開酥皮，CONY梗係要相機食先。 孟加拉大蝦咖喱 （Benegali Prawn Curry）$260：除咗經典嘅牛油雞，CONY更想推介呢款加入芥末、椰子製成嘅咖哩，不但風味獨特，大蝦與咖哩一同慢煮，入味得嚟又唔會過熟，咖哩質感亦十分細滑。 芒果雪條（Mango Kulfi）$80：以煉奶、新鮮芒果、果仁和小豆蔻等香料炮製而成，口感細滑似雪糕。 檸檬撻（Nimbu Lemon Tart）$80：撻皮帶有淡淡印度香料味，配自家製藏紅花檸檬雪糕，味道獨特又清新。Nimbu Pani $70（左）、芒果乳酪（右）$80(CHAAT)餐廳劃咗一個細小房間放滿印度香料，有興趣嘅客人可以入去探索。 牆上充滿印度風情嘅壁畫出自當代藝術家Kandi Narsimlu手筆。(CHAAT) 餐廳設有戶外座位，可以飽覽維港景色。(CHAAT)隨限聚令放寬，現時餐廳設有晚市堂食。如果唔放心出街食，餐廳都有如常供應外賣、送餐服務，外賣自取更有85折優惠，惠顧$1,100或以上可享免費送貨。CONY覺得咖哩菜式和Tandoor燒烤特別適合外送，即使要翻熱味道都唔會同堂食差好遠，至於街頭小食系列大多係炸物，堂食就會比較好啦。
CHAAT
地址：尖沙咀梳士巴利道18號香港瑰麗酒店5樓
營業時間：早上11時半至晚上9時（逢星期一休息）
電話：5239 9220
備註：9月4日起營業時間至晚上10時
留言 1
烏波王
寫左咁多年一d進步都冇
條脷廢既 你咁多年以黎食咁多間
依間某d食材同其他有咩分別又講唔到
一尾剩係幫間鋪包裝
2020年09月04日08:06
顯示全部