請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

【搵食CONY】日本連鎖燒肉店登陸荃灣 抵食套餐首推M9和牛肉眼

LINE TODAY 發布於 03月02日08:57 • 搵食CONY

晚市堂食終於重新開放,唔知大家第一時間去食咩呢?CONY就立刻諗起燒肉,雖然CONY試過喺屋企食,不過好易搞到滿屋油煙,加上有啲餐廳主打不同刁鑽部位,普通人難以入手。好似今日為大家介紹嘅「牛繁」,係日本出名嘅連鎖燒肉店,已開業35年。品牌約3年前登陸香港,去年尾更於荃灣開設全新分店,不但位置更闊落舒適,更推出多個抵食套餐讓你一次過嚐盡多款招牌肉類和特色部位。

新裝修新烤爐

新店設於海之戀商場,佔地2,700平方呎,相比尖沙咀店座位更闊落舒適。此外,餐廳亦改為採用日本製造嘅下抽式無煙燒烤爐,唔怕食到滿身油煙。

燒烤爐以下抽式抽走油煙,燒完唔會成身一陣味。

全新抵食套餐

至於最重要的食物方面,以往尖沙咀店只有單點菜式,而新店則推出多款抵食套餐,一個價錢包括幾款肉類、前菜和小食。最平嘅「二人前推介套餐($548)」,可享用特上牛五花、牛胸腹肉、蔥燒中落牛肋肉、骨間牛肋肉,以及兩款豚肉或雞肉,再配兩款沙律和兩款漬物。

特上牛五花、牛胸腹肉、中落牛肋肉為餐廳招牌「牛繁三點盛合」,幾乎在每個套餐都見到蹤影。而每款肉品均可挑擇調味醬汁,包括鹽醬、燒汁、柚子胡椒、味噌或辛味噌,全部由日本直送。確保令你食得出日本風味。
前菜和配菜方面的選擇亦多,包括和風番茄、大崎蟹柳沙律、泡菜、酸辣青瓜、和風菠菜等,平衡燒肉的油膩。

刁鑽雞部位

雖然日本燒肉中,牛是重點,但其實日本人對燒雞都好講究,而餐廳不但採用肉質細滑,而且呈櫻花般粉嫩嘅北海道「櫻姬雞」,仲提供多款雞嘅刁鑽部位,例如爽口帶點煙韌的「雞頸肉」、口感彈牙的「雞皮」和肩胛骨連接翼的帶肉軟骨「雞三角」。

套餐中可自選豚肉和雞肉款式,可從豬五花、豬梅花、豬頸肉、櫻姬雞腿肉、櫻姬雞頸肉、日本雞三角、新瀉雞皮等中選擇。
CONY首推新瀉雞皮(左)及櫻姬雞頸肉(右),一來坊間較少有此兩款部位選擇,而新瀉雞皮的質地較一般雞皮彈牙,燒起來脆卜卜又充滿油香,雞頸肉則與一般雞肉質感不同,爽口又帶點嚼勁,食起來又不會太油膩。

人均$315食盡和牛、海鮮

如果想食更高質或更多不同部位嘅燒肉,可以選擇「四至五人前豪華套餐($1,628)」或「六人前店長嚴選套餐($1,888)」。其中六人餐更抵食,每人$315,即可品嚐9款靚牛,如澳洲M9和牛肉眼、Prime Grade肉眼扒、骨付大判牛小排,還有4款豚肉或雞肉、3款海鮮、野菜盛合、沙律及漬物各4款,相當豐富。

六人前店長嚴選套餐$1,888:9款牛肉包括特上M9和牛肉眼、Prime Grade肉眼扒、骨付大判牛小排、厚切牛舌、蔥燒薄切牛舌、壺漬牛肋條、特上牛五花、牛胸腹肉、蔥燒中落牛肋肉及骨間牛肋肉。
特上M9和牛肉眼:略燒10秒即可食用,油花豐富,口感幼滑,但又唔會食到成口油而品嚐不到肉味,推介!
Prime Grade肉眼扒:較M9和牛肉眼厚切,口感更實在,而且是頂級的Prime Grade,食落肉味十足。
骨付大判牛小排:經薄切的牛小排口感更軟稔。
牛舌有齊厚切、薄切,滿足晒兩個願望。
海鮮方面,CONY揀咗原條蒲燒鰻魚、扇貝及北海道甲羅燒,而其中扇貝和甲羅燒各得2件,6個人食略嫌有啲難分,不過每款都新鮮美味。
不得不提的還有餐廳秘製辣椒醬(中),以和牛油花、多款辣椒及香料調製,十分惹味,能令各款燒物味道層次昇華。
焦糖奶油啤酒$58(左)、Suntory黑金啤$58(右):新店推出兩款全新酒品,前者以Sapporo生啤配上自家製焦糖奶油,後者則將清爽果香的白啤酒與麥味濃郁的黑啤酒混合。

除了以上抵食套餐,餐廳現時更推出兩個時段優惠:下午3時半至6時入座,單點餐牌8折,而晚上9時後入座,單點餐牌85折,另有多款午市套餐供應。如果大家想以合理價錢一嚐高質燒肉或特別肉類部位,牛繁都係個唔錯嘅選擇。

牛繁 Gyushige
地址:荃灣大河道100號海之戀商場2樓2025號舖
電話:2123 9097

攝影:Franky