夏天又就嚟到啦！除咗準備美白、泳衣、仙氣夏日裝束，但係你又準備好魔鬼身材去迎接夏日未呀？如果同小編一樣身為一個稱職嘅吃貨，又唔願郁，唔想做運動但係又想瘦？除咗發夢之外，唔通真係冇嘢可以做？就等小編介紹瘋魔歐美嘅GM Diet 奇蹟食譜俾你睇吓打唔打救到你啦！好多明星同模特兒都係用緊喱個食譜咖，仲聲稱一星期可以減到8kg ,係唔係真係咁神啊？!就等小編公開個食譜俾你地睇下啦！DAY 1 #水果日
第一日就係水果日，冇咩女仔唔鍾意食水果，小編估計應該好多女仔都接受到啊！水果種類不限，但要注意唔可以食香蕉，需要以高纖同低熱量為主，時間不行食到飽為止，建議避免選擇高糖分嘅生果，可以選擇蘋果、火龍果或草莓等等，而且必須要補充配合8至12杯份量嘅水!
DAY 2 #蔬菜日
第二日就係蔬菜日，同時可以攝取澱粉質，早餐建議可以選擇薯仔或者番薯！其他時候可以選擇高纖維嘅蔬菜，無論係沙律或者其他烹調方式都可以，亦都可以選擇豆類補充蛋白質，有研究指出蛋白質可以幫助燃燒脂肪！所以平時攝取多啲蛋白質，對減肥都好有幫助，同時亦都要飲8至12杯水！
DAY 3 #蔬菜+水果日
第三日就係水果加蔬菜，可以自由配搭，但係都需要盡量避開香蕉同埋薯仔呢兩種食物！因為薯仔同香蕉嘅澱粉質含量同埋糖分亦都比較高！同時亦都需要配合攝取8至12杯水一日
DAY 4 #香蕉牛奶日
第四日就係牛奶加香蕉，身為香蕉愛好者嘅小編表示10分滿意，全日以食8至10條香蕉為上限，同時可以飲4杯牛奶！想分開食，或者打成香蕉奶亦都可以，如果唔鍾意飲奶嘅Sis ,可以用豆漿取替，而每日攝取8至12杯水嘅份量，都唔好忘記呀！香蕉加奶嘅飲食法，有助腸道蠕動排出體內廢物！
DAY 5 #番茄+水日第五日就係蕃茄日！番茄對減肥人士嚟講，絕對係一樣減肥佳品，可以幫助排水！餐單以攝取番茄為主，全日大約可以食六個番茄左右，食番茄當然唔夠飽啦！係午餐嘅時候可以加一碗糙米飯同埋一份瘦肉，如果鍾意食魚嘅先可以選擇魚類！今次飲水嘅份量就會略為調升，去到12至15杯水！
DAY 6 #水煮日
第六日就係水煮日，以水煮嘅烹調方式，應該對長期同減肥作戰嘅Sis一啲都唔會感到陌生！主要以水煮蔬菜為主，午餐就可以放肆啲，食一碗糙米飯同埋一份瘦肉！咁就唔會餓親啦！緊記同時亦都需要一日飲8至12杯水!
DAY 7 #果汁日
恭喜你終於去到第七日啦！主要亦都係以蔬菜水果為主，今次就可以將蔬菜同水果打成汁嚟飲，如果覺得唔夠飽嘅話，午餐亦都可以加多一碗糙米飯架！唔好唔記得要飲8至12杯水呀！
七日嘅餐單咁就完成啦！其實餐單嘅原理係以高纖同埋水份，達致減肥瘦身嘅效果！食得飽之餘又可以排毒！但係營養師建議，唔可以長期用以上嘅食譜嚟到減肥，只可以間中用嚟急救！當然減肥係一件長期作戰嘅事！如果想長期保持完美體態，當然運動係唔可以缺少嘅一個環節啦！除咗減肥餐單可以極速減肥之外，唯一要保持魔鬼身段嘅只有運動可以幫到你！
source:網上圖片
留言 0