有時候，上一代嘅智慧真係令人終身受用：正所謂創業容易守業難，如果要Apply喺愛情上面，應該就係溝女唔難，但要氹住條女就好困難！講真，一個女仔Dry咗幾廿年，多多少少都需要愛情嘅滋潤；只要有個男仔對自己好啲，條件唔太差又有幾分Caring，真係好容易就把持唔住！
不過人類最大嘅缺點就係得寸進尺……一旦一齊咗，就開始諸多要求，郁啲就激嬲又要氹返，真係咪話唔頭痛！ 所以今日想特登寫番一篇攻略， 教下各位點氹另一半！想氹返你嘅伴侶， 唔再係流於靚仔靚女嘅層面， 就好似見工一樣，如果已經過咗CV Screening， 之後最著重就係你嘅工作態度同埋表現！如果你自問唔係氹女／氹仔專家，即刻睇下以下三招啦！
1. 靜靜聽佢嗡
一個人發脾氣嘅時候， 理性嘅分析同埋解釋係冇用嘅，只要你嘅取態唔啱佢心意，話知你搬埋愛因斯坦嘅相對論出嚟，佢都係會一巴掌車埋你度。與其火上加油，不如靜靜地畀佢冷靜下，等佢知道你會陪喺佢側邊，可能已經好足夠！有時下下講道理都未必係好事， 正如愛情本身都唔係用科學解釋得到啦！
2. 暫時順下佢意
如果你真係做咗啲嘢激嬲佢， 好人好者做番啲嘢補償都係好合理嘅……Given that佢嘅要求唔過火的話。 平時行街嗰陣，留意下佢有啲咩鍾意食或者想買， 當下偷偷記低但唔好買住，去到重要時刻嗰陣，就可以買嚟大派用場。當然啦，如果你伴侶成日無故發脾氣要你買嘢嘅話，你就自己衡量下喇！
3. 扮可愛
事先聲明，如果你已經一日到黑都喺度扮可愛，咁就懇請你收一收……返你嘅演技。對於平日不苟言笑嘅人，尤其係男士，突然一反常態扮動物扮可愛，只為搏紅顏一笑，其實真係幾跳tone。趁住呢個令伴侶訝異嘅Moment，輕輕將佢一抱入懷，無論上一秒有幾嬲，下一秒都立即拋諸腦後啦！
除咗一啲傳統嘅方法，不妨可以再試下Wild啲，例如送一個大大嘅熊抱/胸襲畀佢，又或者直接強吻襲擊！根據唔少女仔向小弟分享，其實親密嘅肢體接觸，有時真係勝過千言萬語。咁當然，如果你係犯下彌天大錯，例如背住佢出去One Night stand、借佢啲錢過大海再賭清光……咁你自行了斷可能會比較恰當。
講咗咁多方法，去到尾其實都係要靈活運用、對証下藥。如果你又冇錢，又唔細心、又唔溫柔，咁就唯有最後嘅方法：自宮……呀唔係，獻身啦！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**
留言 0