近年迪士尼推出好多真人版電影，《花木蘭》、《阿拉丁》、《獅子王》等經典動畫都拍緊真人版電影，而今次有史迪仔份嘅《扮嘢小魔星》亦都會翻拍做真人版電影。
《扮嘢小魔星》早喺2002年上映，故事背景發生喺夏威夷，Lilo嘅父母喺車禍中喪生，同姐姐相依為命嘅Lilo無真正嘅朋友，所以姐姐Nani應承帶佢領養一隻狗。
去到收容所同喺外太空逃走出嚟嘅基因實驗生物626相遇，並且堅持要領養佢，仲幫佢改名做「史迪仔」，領養咗史迪仔嘅Lilo並且同佢成為好朋友。
不過因為帶走史迪仔，Lilo佢哋而被負責實驗嘅強霸博士同獨眼霹靂等人追捕。不過最後史迪仔都安全咁留喺地球，成為Lilo屋企嘅一份子。
當初呢套戲上映嗰陣票房成績唔算非常之好，但外星生物626史迪仔就大受歡迎，成為好多大人同小朋友最鍾意嘅迪士尼角色。
今次真人版《扮嘢小魔星》會由真人版《阿拉丁》嘅制片人Dan Lin同Jonathan Eirich擔任監製。
今次亦都係迪士尼喺2006年《扮嘢小魔星》最後一集後，隔12年再度翻拍，呢套電影預計會係真人演出+CG制作，暫時未知幾時上映，或者會喺迪士尼2019年推出嘅線上串流平台播出。
睇嚟迪士尼嘅真人版電影會陸續有嚟啊！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0