識飲識食
好耐都冇煲依個小小豬口中嘅熱利賓納湯，因為前排都唔見靚嘅紅菜頭，雖然紅菜頭可以防癌、護肝、解毒同埋益氣補血功效，但唔靚嘅就唔好勉強，一陣煲完唔好飲就嘥晒啲湯之餘，仲浪費晒我嘅心機。
前幾日買餸就終於俾我見到好靚嘅紅菜頭，就連啲莖葉都好新鮮，所以諗都唔諗就即刻買返個嚟煲雜菜湯，係時候要排清體內毒素啦哈哈哈！
材料：新鮮紅菜頭1個(如果平時係街市冇大紅菜頭，就可以用兩個小型代替)、番茄2個、 蘋果2個、粟米1條、西芹1扎及薑幾片~
先將紅菜頭洗淨，然後去皮及切片。佢嘅莖葉都好有用，所以洗淨切段後加埋入去一齊煲呀~
蘋果洗淨後切件；西芹洗淨切段~
粟米及番茄洗淨後切件；薑片去皮之後拍鬆~
煲內放約3L水，然後隨水加入薑片。我個人覺得加多幾片薑會更加好飲，不過因為要就小小豬關係，我只係加左五小片~
用大火將水煲滾後，將其餘材料加入煲內~
待水再滾後用大火加蓋煲約15分鐘~
之後轉慢火加蓋煲多50分鐘~
最後加少少鹽調味，之後就飲得啦~
煲過咁多次紅菜頭湯，依款可以話係最好飲嘅(當然之前嗰啲都好好飲)，因為飲落真係有啲似羅宋湯，有好甜嘅紅菜頭之餘，又有好香嘅西芹味，所以話咁快就成煲KO晒，超有滿足感呢！
溫馨提示：
雖然各種食材都係好溫純，不過始終個人體質都有所不同，我啱飲時又未必每個人都啱，所以大家記得煲之前了解下自己，或者問下相熟中醫/藥材店職員，呢個湯料啱唔啱自己呀！
*本文章的內容若未經授權，不得轉載