趁依家清閒，學吓煲老火湯都好，煲親老火湯就總有一種材料係唔少得，就係一小塊金華火腿嘞！咪睇少呢塊肉，細細一塊已可以為成煲湯吊出鮮甜味，絕對有畫龍點睛之效，至於點樣揀靚嘅金華火腿呢？原來，都唔簡單，需要觀其色、聞其香，以及摸起嚟夠唔夠乾身喎！
火腿表面唔可以有黑點，呈黃褐色或桃紅色最好，而脂肪部分要係白色或微紅而富光澤；瘦肉部分則要呈深玫瑰色或桃紅色。此外，切面要夠平，聞起嚟有陣甘香臘味；最後係要夠乾身。
煲湯多數會用帶骨嘅火瞳骨或火爪（原隻金華火腿下半部分），骨多肉少膠質豐富，熬出嚟嘅湯仲會帶點奶白色添！亦有唔少老一輩愛用全隻髀最靚嘅上方（或稱火塊）部位嚟煲湯，由於有肥有瘦又有皮，仲可以用嚟蒸魚、炒菜，甚至炮製成經典名菜──蜜汁火方添呢！
東網網站 : https://on.cc/
東網Facebook專頁 : https://www.facebook.com/onccnews/