相信有唔少人或者大家身邊嘅朋友，都會不時因為對某件事或行為嘅執着，而諗為自己「有強迫症」。但事實上，究竟點先判斷到自己真係有「病態上」嘅強迫症，定只係「完美主義者」、緊張大師或者只係有「強迫症思想」呢？小編決定為大家分析下，以免引起自己不必要嘅憂慮啦！
好多人會笑身邊人有強迫症好奇怪，又或者覺得自己有強迫症代表做事有要求、謹慎等而自豪，但其實強迫症呢種病不容看輕，嚴重情況下仲會令強迫症患者產生自殺念頭！
要知道自己係咪真係有強迫症，可以先了解強迫症嘅6種常見類型：
1. 重覆無意義行為型
呢類係最典型強迫症患者會出現嘅特徵，患者會浪費非常多時間不斷重覆無意義行為，而且會伴隨強烈困擾。例如「外出前如不斷重複檢查燈、房門、熱水爐」、「不斷重覆洗手」、「不斷重覆確認銀包內有幾多錢」等。
2. 奇怪行為型
最常被認為有強迫症嘅特徵就係因無意義嘅思想或執着，而出現一啲奇怪行為。例如「瞓覺一定要用被遮腳，因為總覺得會比鬼摸手摸腳」、「用半個鐘將一粒櫻桃核舔乾淨」、「行路要跟階磚或線，唔可以踏界」等。
3. 完美主義型
完美主義型強迫症患者也是很普遍嘅一種，常見就是要求強制對稱、置中、對齊等，可以話喺大部分從事設計行業者會出現嘅特徵。例如「每個圓大小要一致」、「兩張枱不能一高一低」、「貨架上物件全部Logo要對外排好」等，當見到唔整齊嘅事物往往會不受控制咁嘗試排整齊。
4. 強迫思考型
呢類型患者會反覆回憶一系列事情，並且會對所思考嘅事產生疑慮，但依然控制唔到自己去思考。例如「錢包入面嘅紙幣係咪無順面值大小放」、「有無嘢唔記得拎」、「牙刷有無朝同一方向擺」、「出門係咪無鎖門」等。
5. 強迫數物件型
呢類型患者會不時去數身邊嘅事物，當數唔清嘅時候會覺得煩擾、難受等，並且會想堅持去數清楚。例如「見到文字就會想數筆劃」、「數大廈嘅窗」、「數自己食咗幾多粒糖」等等。
6. 大量儲存無意義舊物型
呢類型怎少人會認為同強迫症有關，往往好少人會正視問題，但其實都係強迫症一種！患者怎至會連包裝紙、膠樽蓋、玻璃樽等都唔放過，就算家中已經無位擺，都仲要繼續收藏。患者唔似得一般收藏家咁收藏有價值、意義之物，係連一般人眼中無用嘅垃圾都可能要儲存。
其實每個人唔多唔少都有強迫症思想，點先知自己係咪真係有強迫症呢？就係真正患有病態上強迫症，不論邊種類型，都會有以下4大嚴重特徵：
- 病徵發生時會引起強烈不快、焦慮、痛苦，怎至感覺生不如死，影響生活、工作、身心健康，嚴重仲會出現自殺念頭。
- 患者有意識知道喱件事唔應該做，或者會嘗試抑制自己唔去做，但往往都係控制唔到。
- 使患者不斷做出奇怪行為，或產生荒唐嘅思考，並非因為生活習慣、性格、邏輯思維而成，而係因為內心所產生嘅巨大恐懼、焦慮、不安。
- 病徵持續至少兩星期或以上
如果身邊朋友或自己同時存在以上問題，咁好有可能真係患上強迫症，強迫症算係精神病嘅一種，最好盡早求醫，靠藥物根治！
小編都有聽過身邊唔少輕度強迫症朋友嘅事例，試過見到網上流傳嘅刻意唔整齊、去測試有無強迫症嘅圖片，朋友一下子就將電腦打爛；亦有朋友要求所有嘢都要一式一樣，若見到自己身上有多過兩隻顏色，就會產生自殘甚至自殺念頭；也試過有朋友去旅行前要執行李10次，到旅店要再執一日，回程前都要再花一日去執行李，所以一般7日旅行中，只有5日會外出。
所以只要唔係影響到生活日常，或令自己產生太大情緒問題，都未至於係病態強迫症，唔需要過分擔心！
圖片來源：Shutterstock
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0