【搵食CONY】Happy Friday高級居酒屋散水飯

係人都知我CONY最大嘅興趣係減肥，不過唔食飽又點有力氣減肥呢？今日係Happy Friday，又撞正要同同事farewell，搵食CONY當然係時候出動搵好嘢食啦。

今次帶同事去咗位於銅鑼灣的「權八居酒屋」食lunch。權八喺日本係非常知名嘅居酒屋，2002年喬治布殊訪日時，小泉純一郎就帶佢到權八的西麻布店。一直以來權八都集中在日本發展，直至數年前終於被帶到香港，更不時在米芝蓮推介中榜上有名。

講返食物方面，今日我就叫咗汁燒海鰻溫泉蛋飯，set lunch包埋前菜、沙律、麵豉湯、甜品還有飲品，頗為豐富。海鰻肉質鮮嫩，燒得剛好，充滿肉汁，將溫泉蛋伴飯同吃更添香氣。不過唔知點解有堆肉碎，感覺搶掉海鰻嘅鮮味。

有位同事就嗌咗海鮮特上魚生飯，不過有趣地一塊魚生都冇，唔知係咪每次精選的刺身都唔同？雖然如此，同事話當中嘅海膽、蟹肉、牡丹蝦和三文魚籽都新鮮好食。

另一位同事就選擇咗炸黑豚豬扒定食，看見豬扒厚切得慷慨，而同事就話炸得香脆鬆軟，不過怕肥的人可能會覺得豬扒有點太肥。

居酒屋的主打離不開是燒物，但除此之外，權八嘅天婦羅其實都做得唔錯。奉上之前幫襯食過，評分不錯嘅玉子燒和天婦羅。

總括而言，權八行高級居酒屋路線，環境舒服，服務亦有質素，set lunch設計亦頗有誠意，佢哋仲不時到日本搜羅新食材帶返香港，所以成日有時令新菜式。有時想食好啲，係一個唔錯嘅選擇。

權八居酒屋

地址：銅鑼灣希慎道33號利園一期4樓

查詢：27873688