相信唔少人都一定試過無論個人幾攰都好，就係點瞓都瞓唔著。到底點算好呢？最近小編就發現一本書名叫《放鬆與勝利：冠軍表現》（Relax and Win: Championship Performance）介紹咗一個美國訓練士兵快速入睡嘅方法，據指經過練習之後，有近96%嘅人可以喺2分鐘內入睡！
原來呢個方法係喺二次世界大戰時，美國空軍機師無時無刻都活喺壓力當中，搞到佢哋無法入睡。
為了令士兵唔會因為睡眠不足，而喺戰場上做出錯誤判斷，當時嘅海軍少尉溫特（Lloyd 「Bud」 Winter）亦係此書嘅作者，與心理學家共同研究出一套「快速入睡」嘅方法。
根據書中所寫，呢個方法喺經過反復練習後，有近96%嘅人都可以喺2分鐘內入睡。
溫特指睡眠嘅定義係「身心放鬆嘅狀態」，只有當身體放鬆過後，精神先會跟住放鬆，關鍵在於「停止腦中嘅思考」。如果你一直反復思考，會令肌肉緊張同時抑制睡眠，從而引起失眠問題。
簡單嚟講，秘訣就係放鬆同唔好諗嘢！
放鬆身體4步曲：
第1步：閉上眼睛，放鬆所有肌肉；
第2步：把肩膀盡量放鬆、垂低，放鬆頸部後面的肌肉，並讓雙肩肌肉逐邊放鬆；
第3步：深吸一口氣，然後慢慢呼出，放鬆胸部及上半身；
第4步：最後慢慢放鬆雙腳大腿、小腿及足踝肌肉。
全身都放鬆之後，可以幻想自己喺一個風和日麗、湖面平靜嘅獨木舟上，藍天白雲，專注想像呢個畫面10秒；或者喺腦中不斷同自己說「不思考、不思考、不思考」持續10秒。
作者又指呢個方法就好似一個技能咁，唔好希望好快可以學識同見效，一定要經過反復練習，熟練之後就會能越嚟越快放鬆身心，達到快速入睡的效果。
如果大家有失眠嘅困擾，不妨試試呢個方法呀！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0