歐鎧淳 （Stephanie）是十多項香港紀錄保持者，有「東方維納斯」與「女飛魚」美譽。16年她在里約奧運為香港擔任持旗手驚艷全場，被中外媒體封為最美持旗手，19年於新加坡世界盃女子一百米背泳決賽以1分00.22秒首度達到奧運A標門檻，今年終可以代表香港泳隊出戰東京奧運，進行女子100米背泳及4×100米混合泳比賽。
她幼小中就讀名校嘉諾撒聖心，大學升讀加州大學柏克萊分校，加上外貌出眾，被視為「人生勝利組」。歐鎧淳坦言，她是家中獨女，媽咪對她全程投入，事事以她的興趣為先，又為她安排好每日時間表，讓她平衡好游泳與讀書。不過，她得到父母關愛的同時，她的性格開始變得高傲與自我中心，原來「人生勝利組」只是假象，在香港是品學兼優的女飛魚，在美國只是個不懂與隊友相處的港女。歐鎧淳為此重新做人，才成就了今天的她。現年29歲的歐鎧淳是電影界和廣告商的新寵兒，但她揚言游泳仍是她的第一位。
撰文：Ling
攝影：Jacy Yip（部分相片由受訪者提供）
化妝：Onki Lau
髮型：Stone Cheng@Queen’s Private i
服裝：Ted Baker、Nike (Sneakers)
場地：Popcorn
歐鎧淳9歲習泳 16歲參加奧運
游泳既是求生技能，又可強身健體，家長送孩子學游泳有愈來愈早的趨勢，低至三歲就上泳班，部分家長以為愈早學習游得愈叻，還有機會參賽奪獎，藉此博入好學校。 歐鎧淳的故事證明，習泳的年齡無礙將來發展。
她九歲時為了加入學校正籌備的泳隊，才開始跟親戚學游泳，再加入泳會訓練，一次比賽被教練賞識下作重點培訓，她15歲參加「香港公開游泳錦標賽」一鳴驚人，在200、400及800米自由泳三達奧運標準，16歲中四決定停學一年集訓備戰北京奧運，最終在比賽上接連打破200米及800米自由泳港績，成為泳壇新星。
自選課外活動 需堅持一年
小時候，歐鎧淳的媽媽讓女兒多嘗試不同課外活動，從中發掘其長處，而歐媽媽絕不強逼學習，會讓女兒自由選擇，但設下一個條件，歐鎧淳說：「當我決定咗就要堅持學一年，就算唔鍾意都要頂硬上，學得好唔好唔緊要。所以我唔可以信口開河，唔可以想要就要，唔想要就隨時掉低，因為我一話要做，個責任就喺自己度。」
唯一一次由媽媽強逼的，就是學琴，因為大趨勢是每個小孩都要學識一種樂器，而彈琴是最基本。「唔知點解個個都要學琴，又唔知點解係學音樂嘅入門。媽咪要我最少考到八級，將來可以做鋼琴老師，我當時已經識諗：點解我要做鋼琴老師啫？」強逼學習難有好成效， 當歐鎧淳考到第六級不合格，並再向媽媽重申不喜歡學琴，她終於「得償所願」，並轉玩自己喜歡的小提琴，「最後拉到手指痛，學咗一年就冇學了。」
管理時間表 排優先次序
其中一個堅持最久的興趣是芭蕾舞，原以為芭蕾舞就是她的至愛，但她九歲接觸水世界後，從此世界變得不一樣。「我鍾意喺水裡面多啲，其實拉筋同跳舞好辛苦、好痛，游水舒服得多。當時我唔夠時間玩兩樣，星期日一係去練舞，一係去游水比賽，只能二揀一專心練習。」看到女兒在水世界的天份，歐媽媽當然大力支持，並教識女兒管理時間，平衡游泳與學業，其中一招是安排事情的優先次序，歐鎧淳解釋：「第一係急切兼有需要，第二係無咁急切但有需要，最後係唔急切又無需要，得閒先做。」
計劃時間表時，要知道人的能力有限，所計劃的事情未必能夠一日做完，「中間要留空白位畀自己走盞，細個我都唔識，好貪心好多嘢想學，全靠媽咪一直幫我安排。」歐媽媽為女兒安排的時間表看來很「怪獸」，星期一至五要上學，星期六還要參加幾個課外活動由朝上到晚，「我唔介意，我覺得好開心好好玩，因為係我鍾意學㗎嘛，好似上烹飪班整三文治，整完又趕去游水。」
「聖心妹」不怕功課多
歐鎧淳指媽咪不是怪獸家長，而是一個尊重孩子意願、做輔助角色的家長。「怪獸家長係主導小朋友，唔理小朋友想定唔想，只係逼小朋友去做佢哋認為啱，或者去迎合香港教育制度嘅事，我媽咪係唔會咁做，一切以我興趣行先。」
從幼稚園到中學，歐鎧淳都是「聖心妹」，小學讀下午津貼部，課程比上午私立部輕鬆一些。「由細到大我都讀得好開心，我比較樂觀啲，主要睇好嗰方面。至於功課間間學校都差唔多，就算多功課我都唔會將個責任推畀學校，會自己諗辦法解決先，多功課咪自己安排好啲時間，用快速嘅方法做完佢囉。我練完水返去已經六點，食完飯七點，媽咪又要我早瞓，得番一兩個鐘趕功課，咪專心啲快快趣搞掂佢。」
再一次證明玩運動不會阻礙讀書，只要時間分配得好，對讀書上心，就能兩者兼顧得好，「雖然我少咗時間，但我做得比人快。」做完功課還要過媽媽一關，任職律師樓市場部的歐媽媽一直對女兒的學業很用心，在女兒小學階段，放工後還會打一頁A4英文文章，出題讓女兒做填充輔導，感動得女兒大讚媽咪：「由細到大佢都對我全情投入！」
高傲獨女 在美國學團隊精神
一直以來，歐鎧淳在溫室家庭中成長，游泳與學業亦兼顧得好，慢慢躋身「人生勝利組」。惟身為獨女的她，在性格上顯然變得自我中心和高傲，一到美國讀大學就出事。「無咗媽咪喺身邊照顧我，所有嘢都要靠自己從頭再學。我喺香港好叻咩？喺美國大把人游得快過我，讀書叻過我，我喺咁多人之中等於零。」她在大學泳隊曾被排斥，加上高手如雲，情緒跌至低點。後來有隊友點醒她要多伸出援手，關心隊友，終能慢慢融入泳隊。
歐鎧淳形容自己是重新做人，泳隊令她成長了許多，改善了自己的不足，並真正認識何謂團隊精神。「我終於識得做隊友，以前我只係識得叫隊友做呢樣嗰樣，原來要多啲幫助其他人，唔可以淨係諗自己，要諗人哋先，其實做人根本就係咁。」
生涯尾聲 游得一日得一日
歐鎧淳的生活以至人際關係，早已和游泳密不可分，甚至被游泳主導了生活，「好多機會同人際關係，係喺泳池同以運動員身份得到。」游泳幫助她全面成長，從水中把經驗帶返生活上，歐鎧淳說：「喺水入面唔可以同水對抗，要感受水嘅存在，並借用水力去推動自己，呢啲小道理都能應用喺生活上面，好多嘢都係游水教識我。」
29歲的她，游泳生涯逐漸步向尾聲，腦海經常浮現「我是否仍可游下去？」當大家看到她常出席公開活動，又是電影界及廣告商的新寵兒，她是否已為退役後入娛圈鋪路？「其實我唔會鋪後路，如果鋪咗後路個腦就會成日諗，不自覺向咗呢個方向走，所以我想全心全意游水。我有機會接觸娛樂圈嘅嘢，都係游水帶畀我，無咗游水我咩都唔係。」不過貪心的她喜歡新鮮感，嘗試接觸不同的工作，終於有段時間兼顧不來令健康受損，影響游泳的表現。「因為休息唔夠整親條頸，撞過板就受到教訓。我要重新將生活排序，首先係游水訓練同休息，之後先係其他工作。」
對歐鎧淳來說，游泳是她的責任，希望自己游得一日得一日「就算聽日做咩都未知啦，我隨時都可以玩完，但我唔會諗太多，每一日最緊要做好練習同休息，游到幾多得幾多。」
留言 0