要數到香港人最鍾意嘅中菜，川菜一定榜上有名。除咗早年流行嘅麻辣火鍋，近年仲愈開愈多川菜館，更有年輕化趨勢。好似去年底新開嘅「麻辣五三五」，主打正宗川菜，但餐廳裝潢就唔似傳統中式菜館，而是帶玩味並設打卡位，就好似餐廳名咁，適合同幾位朋友小聚一番。
餐廳係樓上舖，面積唔算好大，喺窗上設置嘅幾個霓虹燈牌係設計亮點，坐喺吧枱可以打卡。雖然餐廳設計帶港式風情，但大廚對四川味道十分講究，曾特意到四川考察。除與當地廚師交流，更搜羅咗各種香料、醬汁及辣椒，例如二荊條、青花椒、子彈頭（朝天椒）、鬼椒、四川生抽、豆瓣醬等，炮製出一系列以傳統味道為基調嘅川菜。
餐廳由涼菜、小食、小炒、干鍋，以至是水煮都一應俱全，除咗傳統菜式，仲加入咗少許創新意念，好似「蒜泥白肉」中自家製蒜泥帶沙冰口感，蒜香十足而口感冰涼細滑，能中和辣勁；「水煮桂花魚」則以子彈頭、二荊條打磨爆香製成辣椒醬汁，最後灒上自家製辣酒爆香而成，桂花魚質感軟腍入味。
至於小炒系列CONY都相當推薦。「四川香辣大肉蟹」以蔥、薑、鬼椒、花椒、青紅尖椒、干辣椒、大蒜等爆炒而成，肉蟹大大隻，但每一吋都十分入味，當中麻勁較突出，不會過辣而蓋過蟹嘅鮮味。另一道「霸王辣子雞」用上如子彈頭、青紅花椒爆香，奉上時已聞到香濃嘅麻辣香，而雞肉炒得外脆內軟，唔會太乾，十分惹味，下酒一流。最後還有CONY每逢吃四川菜必點的「酸辣土豆絲」，雖然平平無奇，但微酸開胃，CONY總會吃個不停。
雖然餐廳主打四川菜，但好似CONY咁唔太食得辣，又鍾意過下口癮嘅人都唔需要擔心，餐廳菜式可選擇大、中、小辣，部份菜色更可走辣，而CONY今次品嚐大部分菜式的麻勁比辣勁強，而且椒香撲鼻，對於唔太食得辣嘅CONY而言啱啱好。餐廳又設有全日單點食品外賣85折優惠，即使在家抗疫都可以品嚐麻辣滋味。
麻辣五三五
地址：尖沙咀寶勒巷10號8樓
電話： 5404 0522
留言 0