一個月激減10KG引熱話！ 韓國BTS粉絲自創「模擬演唱會減肥法」

對於一眾貪靚嘅女士們，最邪惡嘅節日永遠都係新年，又年糕又煎炸食物，真係想唔肥都難。不過最近有韓團BTS粉絲喺韓國網站上引起熱話，話說呢位粉絲自創咗一個「模擬演唱會減肥法」，仲親自實測一個月減咗10KG，效果超級驚人！各位女士們，係咪即刻想知點減先？

撰文: K.P.｜圖片來源：BTS@YouTube、BTS@twitter｜編輯：海月

呢個「模擬演唱會減肥法」，簡單嚟講就係模擬韓團喺高壓下，完成一場3個鐘嘅演唱會！實際係點做？首先你要FF自己變成韓團成員，各揀一個Rapper同一個Vocal，以該名粉絲為例，佢將自己想像為BTS嘅SUGA（閔玧其）同柾國，然後喺YouTube或其他串流平台準備一個完整演唱會嘅播場清單，然後，就係從頭由尾認認真真咁跟住唱跟住跳！

由於係要完美咁「模擬」呢場演唱會，呢3個鐘入面所有嘢都要跟足，「成員」幾時停落嚟飲水，又或者幾時係Talk Time先可以跟住休息，就算係非舞蹈曲目，都要跟住一齊唱，甚至係播片過場或者成員嘅Solo Time，亦都要扮換裝，就係要模擬果種高壓狀態。唔單止咁，喺「模擬演唱會」嘅兩個鐘前，就要停止進食，如果連續進行呢個減肥法，就需要好似柾國一樣喺演唱會前一晚，夜晚只能夠食兩條香蕉，要跟足真實演唱會嘅劇本進行，絕對係挑戰極限！

呢篇Po文最初發表喺instiz，然後被轉發至「The Qoo」論壇後，迅即引起一眾網民嘩言，唔少網民都佩服呢位BTS粉絲嘅減肥大法，甚至留言話：「我曾經睇YouTube想學BTS嘅舞蹈，但3分鐘後就投降，覺得肌肉快死掉！」、「一諗起《Dionysus》同《Not Today》呢兩首歌，我已經想暈。」等等 。

最後呢位韓國BTS粉絲靠住呢套「模擬演唱會減肥法」成功減咗10KG，並將第30日嘅「模擬演唱會」當成引退演唱會，各位女士們又會唔會想挑戰一下呢？