叫台灣做「珍珠奶茶之都」真係一啲都唔誇張！除咗滿街滿巷都係高質素嘅珍珠奶茶店，台灣人仲會將珍珠奶茶變奏成唔同嘅食品，好似最近喺高雄爆紅的「珍珠奶茶泡芙」就係其中之一喇！
「珍珠奶茶泡芙」係高雄一間泡芙店「樹. Go Eat」嘅招牌甜品，店家每日下午3:00開始營業，但每日2:00就已經開始有人排隊，因為佢哋會喺2:30開始派排隊籌比排緊隊嘅顧客，所以好多時3:00一開店，泡芙就隨即賣晒，非常之受歡迎！
講返「珍珠奶茶泡芙」，泡芙只賣台幣$40（約HK$10）一個，酥脆嘅泡芙裡面釀咗奶茶口味嘅吉士同珍珠，食起嚟外脆內煙韌，仲有淡淡嘅奶茶香，唔少食過嘅網民都激讚！原先店家可以比每名顧客買12個，但因為太受歡迎嘅關係，而家每人只可以買4個，買4個嘅話就可以獲得可愛嘅焗爐紙盒包裝，包裝入面仲有乾冰，夠晒貼心！
除咗珍珠奶茶口味，店家仲有其他口味嘅泡芙，例如：原味、朱古力味、香蕉味同抹茶味，唔知各位sis又有冇興趣試下呢？
Source：