請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

【搵食CONY】海邊餐廳賞夜景嘆片皮鴨 限定優惠最平$298一隻

LINE TODAY 發布於 04月09日03:55 • 搵食CONY

近年片皮鴨成為最受歡迎嘅中菜之一,而CONY發現近日有餐廳做片皮鴨優惠,仲可以喺海景旁慢慢嘆!位於西九文化區嘅新派中菜廳「FAM囍公館」現時推出招牌片皮鴨優惠,由原價$688一隻減價至最平$298一隻,足足平一半有多,不過餐廳會唔會將貨就價?即睇CONY試食報告。

揉合三大元素

先簡介下餐廳,「FAM囍公館」係一家新派中菜廳,名字隱藏了三大元素,包括「Food(美食)」、「Art(藝術)」及「Music(音樂)」。擅長粵菜、四川菜及上海菜的主廚,將各類型傳統中菜揉合現代擺盤,除了片皮鴨,佢哋嘅精緻點心都相當出名。而餐廳更定期辦展覽和音樂表演,希望聚合一班講究生活態度的朋友,找到「Family(家庭)」嘅歸屬感。

裝修設計以裝飾風藝術(Art Deco)為靈感,大膽嘅色彩運用,加上不同材質嘅配搭,再以浮誇嘅裝飾、藝術品佈置,帶出時尚奢華的感覺。
餐廳位於海濱長廊,如果選擇坐戶外座位,可以對正大海品嚐美食。(相片由品牌提供)
夜晚嘅璀燦海景,更添浪漫情調。

獨創片皮鴨製法

入正題,餐廳今次推出「煙燻片皮鴨」優惠,逢周一至周五享用$298一隻;逢周六、日及公眾假期享用則會貴一點,$398一隻,而優惠必須最少一日前預訂。比起一般片皮鴨,餐廳做法獨特,糅合廣東傳統掛爐鴨製法,配合北京鴨低溫處理,再加入四川樟茶鴨嘅煙燻風味,附上青瓜、京蔥、薄餅等配料。

煙燻片皮鴨:逢周一至五$298/隻;周六、日及公眾假期$398/隻(原價$688/隻)

即席切片更新鮮

片皮鴨先原隻奉上,再由師傅即席在旁切片,新鮮滾熱辣之餘,更符合大家拍片打卡嘅需要。師傅三爬兩撥片好烤鴨並分成兩碟,以便分享。CONY影完相就立即品嚐,先食一片鴨皮,不蘸點醬汁或加任何配料,品嚐原味。佢嘅皮薄香脆,油脂恰到好處,不過樟茶鴨嘅煙燻風味較為淡薄。再將烤鴨放在薄餅上,加入配料和烤醬同吃,更能中和膩感和更添味道層次。

烤鴨嘅皮薄香脆。
CONY比較鍾意食皮連肉嘅部分,皮和肉嘅比例剛好,見到皮脂不會太肥膩。
配料離不開青瓜、京蔥和烤醬,但每間餐廳嘅做法都總會有少許分別。呢度就將青瓜和京蔥剪碎,令你咬起來更容易分開,而且配料分佈更平均。

其他特色招牌菜

除咗片皮鴨,CONY仲嗌咗其他餐廳招牌菜。冷盤「燒椒酸薑流心皮蛋」以燒椒和酸薑碎為皮蛋更添爽口和開胃感;而「煙燻四喜素鵝」包裹著三色蔬菜,好IGable,更為煙燻素鵝帶來清新味道。至於主菜「大廚炒飯」足料又夠鑊氣,炒得乾身美味,「啫啫芥蘭」以石鍋奉上,鹹香有致。想再chill啲,可以嗌埋杯雞尾酒或無酒精雞尾酒。

燒椒酸薑流心皮蛋$48/件
煙燻四喜素鵝$88
大廚炒飯$198
啫啫芥蘭$168
Delightful $108(左)及Tonifying $108(右)

總括而言,就餐廳環境及地段而言,今次片皮鴨優惠真係幾抵,而且質素有驚喜。雖然餐廳其他菜式價位偏中上,但如果4人聚會,嗌多2至3道菜都十分足夠,而當然最抵就係平日光顧啦!再一次提大家,優惠必須最少提前一天預訂,全日適用,而且係期間限定、每日限量,有興趣嘅朋友最好先打去餐廳查詢啦。

FAM囍公館
地址:九龍西九文化區博物館道22號地下1-3號舖(藝術公園)
電話:2866 3667