早前港姐決賽完結之後，落選港姐工藤佑采「黑面跳舞」成為熱話，張敬軒仲將ig icon轉成工藤佑采，而工藤佑采亦都將icon轉做軒仔。兩人交換頭像引嚟網民關注，大家都好好奇佢哋有咩關係。
而琴日張敬軒現身活動嘅時候就開腔解答大家嘅疑問。
原來佢睇咗港姐決賽片段，軒仔話唔認為工藤佑采有黑面，而係處於咩狀態都要chok同be cool，仲話就算真係黑面都有黑面嘅權利咁話喎！
軒仔話覺得工藤佑采「黑面」幾有型，跳舞甩beat同自己演唱會排舞嗰陣好似，覺得好有共鳴。
至於點解會將ig icon換成對方，軒仔表示係當工藤佑采個頭像係emoji，話同同事交流都用工藤佑采張相添！佢仲大讚工藤佑采靚女，答嘢有智慧，係吸引人嘅女仔。
見對方都將icon換成自己，張敬軒就話覺得成件事好有趣，即時follow返工藤佑采，希望將來有機會可以合作，睇下一齊玩乜啊！
目前工藤佑采將頭像轉咗做張敬軒喺活動上做嘅「nobody」動作，同佢做嘅動作一樣，勁搞笑！
好期待佢哋兩個將來合作，兩位都咁幽默，應該會好有火花！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0