香港電台節目《火速救兵IV》上星期六（10／13）首播！呢一輯《火速救兵》就有消防劇之王（歐錦棠同王喜）坐鎮，更係由金像獎導演黃偉傑加盟拍攝，好多網民都大讚《火速救兵IV》製作認真，無論演員、情節都能夠好好反映現實！全劇總共有10集，每集半個鐘。
第一集就講高級消防隊長王智軍(歐錦棠飾)出名火爆，仲畀手下改咗個花名叫「爆人王」。佢同消防隊目江劍秋(何華超飾)係多年死黨，王智軍曾經喺一次處理貨船火警嘅時候，救過「啊秋」，仲話：「我要幾多人入去，幾多人出番嚟！」。
而今次處理氣體洩漏嘅時候，突然出現爆炸，氣流令「啊王」彈飛，差啲跌落樓！好彩「啊秋」一手捉住佢，背脊就不斷畀火燒，撐到一班手足上樓拯救先放手。
但呢一救，令「啊秋」嚴重燒傷，「啊王」非常內疚！但「啊秋」瞓喺病床同佢講：「做消防嘅，就係你揸住（保護）我條命，我揸住你條命咖啦！」呢種出生入死嘅兄弟情，拍得夠細緻，叫人動情！
歐錦棠仲係親身上陣拍爆炸戲，導致左手受傷。導演黃偉傑喺開拍前接受傳媒訪問時都提過，呢輯會搵真·消防員嚟做演員，而有網民表示自己有消防員朋友有份拍攝呢輯《火速救兵IV》，證明冇花冇假，更有人話：拍到同操班一樣!
唔止啊，劇嘅開頭，用咗「一鏡到底（long take)」去拍3分半鐘嘅shot，有網民大讚好正！仲話連消防員出動、「瀡柱」都跟到足！好多網民都話得半個鐘，唔夠喉啊！
好多網民都話半個鐘唔夠喉，歐錦棠喺自己Facebook表示，《火速救兵IV》喺下年一月會有導演加長版！係Fans嘅你就期待下啦～
黃偉傑導演接受傳媒訪問時大讚演員落力，拍攝時連消防啊sir見到班演員嘅表現，都指佢哋合格可以出班！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0