準新娘興高采烈咁籌備緊婚禮，預備嫁到新加坡做出埠新娘，雖然男方家境不俗，但女方都堅持自己掏錢邀請親友飛過去參加婚禮。
整個相識交往過程其實如童話般順利，雙方雖然喺交友apps結識，但大家目標一致，希望成家立室，所以理所當然不到一年，就行到結婚呢一步，偏偏喺籌備結婚嘅過程中，先發現未來老公嘅真面目⋯⋯
每個女仔結婚都想一生豪一次，女方只係想婚禮佈置加錢整個靚啲嘅升級版backdrop，點知未來有錢老公竟然當住公司員工劈頭就講：「我只會畀最平嗰個package嘅錢，你要upgrade就自己畀個差價。」唔單止女方聽完呆咗，成班員工都嚇到你眼望我眼，唔識打圓場⋯⋯
結婚一世人一次，係女仔都希望有個夢幻難忘嘅婚禮，所以比男方更加着緊婚禮過程同細節⋯⋯
雖然作為男人，個backdrop發唔發光、用絲絨底定真絲底、用金色線定黃色線，我同啲賓客真係覺得有分別咩？但畀多一萬幾千，之後幾十年個女人嘈少樣嘢，除返每日唔洗幾蚊，抵畀到爛啦吓話？
男人永遠唔明白，個新娘開唔開心、靚唔靚先係最緊要。連一個backdrop嘅錢都要樣樣計住，如果真係因為經濟壓力，可以雙方一齊商討，但一定唔係當住外人面前，講啲咁令對方難堪嘅說話⋯⋯
除非睇死女方非嫁不可，知道自己有錢，所以女仔點都會嫁，畀個下馬威，否則真係唔明點解，有錢到咁，都可以咁計較、咁孤寒⋯⋯
婚禮只係一個儀式，婚後嘅日子先係生活嘅重心。Backdrop事小，態度事大，連對方嘅感受都唔照顧，又點旨意呢個男人會照顧你下半世？
如果我女朋友要求一隻蝦餃咁大粒嘅鑽石戒指，我都唔敢買隻蝦米咁大粒嘅畀佢啦，為搏紅顏一笑，莫講話蝦餃咁大粒，佢話要蝦餅咁大份我都要買啦，唔驚下半世要食暗黑料理咩？
不過講到尾，佬係自己揀，仆親唔好喊。
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**
留言 0