《破•地獄》題材鮮有，將避忌議題搬上大銀幕，沉重黑暗中帶出人生哲理，非常出色。
（以下有劇透）
「蒼天慷慨的一盞五路燈 給傷痛引渡超脫往來生 又再等」
電影以踏入殯儀業開始，觀眾同道生一樣，由開始對殯儀只有皮毛了解，甚至誤解，慢慢被當中嘅專業震撼，產生敬佩之情。不過，依個只係引子，故事重點在於角色間複雜嘅情感，以及對生死同傳統嘅反思。
「多少的往事終給抱憾淹浸 將灑脫在心內幽禁 留在這悸動月台共振」
文哥一家人矛盾不斷，佢地關係變得如此惡劣，正正因為傳統同現世嘅衝突。傳統顧然有值得保留嘅原因，但係咪要一成不變、不惜一切地跟隨？時代會進步，如果被不知因由嘅舊有說法令重視嘅人難受，又值唔值得？身邊人同傳統，誰重誰輕，相信大家自有定斷，說到底並無對錯之分，只係個人選擇。
故事最後以破地獄解開兩代人嘅心結，催淚至極，可惜彼此已再無法相見。有好多同親人嘅恩怨，係要到天各一方先發現係咁微不足道，只係以前大家唔識同唔敢表達，一家人又邊有隔夜仇。只要多一份表達嘅勇氣，種種矛盾或者會迎刃而解。
「還未斷的根 求誰來悲憫 仍頑固埋首往後行」
電影另一個亮點一定係破地獄儀式，配上大銀幕同戲院嘅音效，簡直歎為觀止，文玥最後喺火跳出嚟個幕型到震！
震撼背後帶出眾眾儀式真正嘅服務對象，其實係在世之人。我地從來唔知死後世界係點，亦唔知係咪真係幫到先人，但可以令留下來嘅人安心，覺得先人喺另一邊安好，其實已經足夠。活人比起死人更需要破地獄。
「滄桑的聲線哼起了南音 響起牽掛種種世事餘韻 未結束 翩翩起了一支最後沒明日的舞」
面對生死絕係人生最重要且困難嘅一課，生離足以令人痛不欲生，死別更係永遠無法磨滅嘅傷口。然而，如電影所言，人生不過係一程車，有長途短途，早落後落，每個人都係向死而生，總要經歷永別。生死有命，我地可以做嘅只有珍惜每一秒，好好欣賞沿途風景，不留遺憾，將回憶安放心中。
整個觀影過程相當壓抑，不斷勾起過往嘅傷口同經歷。當電影最後離開紅磡，即使餘韻仍在，但同時有一份釋懷湧現，彷彿帶大家離開先人嘅陰霾，放下沉重，向前進發。
「輪迴塵間的人 揮之不能 徘徊來生的往生」
朱康同衞詩雅兩位簡直係神級演繹，不斷牽動觀眾情緒。角色塑造立體，兩兄妹同爸爸一段看似疏離嘅感情其實充滿愛，相信唔少觀眾都有滿滿共鳴。
黃子華依舊認真中帶點幽默，坦白講演技唔算太有驚喜，但又會覺得依個角色係為佢度身訂造，無法取替，依個就係子華神嘅威力。
「輪迴塵間的人 今生可能 渡化纏繞的半生」
不過，無可否認劇本尚有沙石，劇情亦唔算石破天驚，但能夠讓觀眾抒發情緒，甚至以另一角度看待殯儀業，仲有得著帶得走，已經稱得上係一部不可多得嘅佳作。
「回望在多少遺憾中普渡的眾生 才覺已得到福蔭」
最後，感謝陳茂賢導演將咁破格嘅議題帶出嚟同觀眾討論，亦證明佢拍喜劇以外嘅才華，未來大把世界！
▼Follow hkpopculturelover
Instagram: https://www.instagram.com/hkpopculturelover/