【影評】《九龍城寨之圍城》充滿香港特色又不落俗套

萬眾矚目之作《九龍城寨之圍城》終於上映，台前幕後不負眾望拍出一部佳作，充滿香港特色又不落俗套，絕對會成為港產動作片經典。

一定要入戲院欣賞，最好揀個mon比較大既！
(以下有劇透)

廣告（請繼續閱讀本文）

「紮根也好旅居也好也許你還未知道答案」

劇本完整嚴謹，縱使劇情走向算係預料之內，但拍得豐富，一層層不斷推進。由洛軍進入城寨，到發現佢身世而起衝突，再到四兄弟重新入城寨復仇，起伏轉折鋪排出色，各陣容互有高低時刻，每段情節更配以令人目不暇給既打戲，好似睇極都未完。

動作場面痴線地緊湊，拳拳到肉，令人喘不過氣來。雖然有加入功夫元素，但同樣會攞刀攞槍攞架撐，唔似葉問式赤手空腳一個打十個，有攻有守，唔會太一面倒，縱然主角有光環但同樣精彩。配上城寨錯綜複雜既世界級佈景、生活化對白，非常貼地。

廣告（請繼續閱讀本文）

文戲亦完全唔沉悶，兩代兄弟情義令人動容，估唔到動作片都牽動到觀眾情緒。

「乘著那風的幻想離別的故事散落途上」

電影用日常情節建構出整個城寨世界觀，彷似置身一個獨立城市，片尾將生活片段配上credit list好有心思，讓觀眾到最後依然投入其中。

廣告（請繼續閱讀本文）

城寨雖則號稱三不管，但居民間感情深厚，互惠互助團結一致，係一個能夠稱之為家既地方。可惜最終逃不過清拆宿命，必須要無奈面對，心離不開，但身留不低。套用喺現今社會同樣合適，就算知道依個地方因種種原因不宜久留，大家又何嘗唔係因為一份情而繼續留低。

風雨過後，導演以《風的形狀》溫柔地為大家平復心情，縱然要離別，亦可以擁抱改變，無需被過去圍困，未來或者會有更廣闊天空等待著你，替電影完滿地總結，係送比香港人既一份禮物。

「換個比回憶廣闊的視角」

故事角色多但性格分明，有血有肉，彼此恩仇交代清晰，仲要個個都型到一個點。

當中劉俊謙最令我深刻，角色從造型、武器、性格都同其他陽剛兄弟有好大對比，一出場就超吸引眼球，估唔到佢喺武打片依然發揮到愛情片既俊俏魅力。

林峯carry曬成套戲，由到香港後孤單絕望，喺城寨拼盡全力生活，慢慢搵到歸屬感。即使身心一次次受到打擊，依然本住打不死精神，最後成功守衛自己既家。角色整個轉變唔易做，但林峯以成熟演技駕馭到。

伍允龍表現充滿驚喜，個種所向無敵既自信霸氣非常震撼，奸險笑聲令人不寒而慄，打戲更加係佢專長，絕對會成為代表作，甚至問鼎獎項。而胡子彤同張文傑亦盡顯硬漢味。

上一代演員好似古仔、洪金寶雖然搶鏡，但戲份意外地唔算太多，最後一段更交曬比新演員，戲內戲外都象徵世代交替，係好有意思既設計。

「流淚的過雲雨或遙望清朗讓一切沒定案」

鄭保瑞導演近年三套作品《智齒》、《命案》、《九龍城寨之圍城》，取材不同但同樣有令人屏息既壓抑感。拍攝充滿黑暗暴力美學，沉重中穿插人生哲理，有種獨特味道同吸引力。

近年港產動作片以警匪片為主，製作的確龐大，槍戰爆炸不斷，但觀眾難免有點厭倦。今次《九龍城寨之圍城》成功打出一條血路，令人歎為觀止，下年金像獎好大機會橫掃獎項，更希望喺外地可以創佳績。

最後，感謝 @onecoolpictures 邀請我睇依部鉅作！

▼Follow hkpopculturelover

查看更多 hkpopculturelover 的文章