如果十年前同你講，林峯將會提名最佳男主角，你必然會答︰「係咪又亞太區影帝，亞皆老街至太子道西最受歡迎男主角呀？」但來到今天，當你睇完《九龍城寨之圍城》後，你會覺得影帝這回事，並唔係冇可能在林峯身上發生。
林峯《城寨》搏到盡
一直以來，林峯予人的感覺就是行斯文靚仔路線，演的都是大好人、暖男、考順仔角色，最深刻印象反而是《尋秦記》中的嬴政。來到《九龍城寨之圍城》，由開拍一刻知道林峯會拍動作片，感覺已有保留，總覺得就是一幕又一幕耍帥大頭配替身狂揪。結果，全程令人刮目相看，縱使林峯的動作未算亮麗出眾，但就是能拍出一份拚勁，拳拳到肉瞓身抽擊，看到的是一份搏到盡的鬥心。
角色成功掀動觀眾情緒
角色上亦成功掀動觀眾情緒，一開頭就是難民身份打黑拳搵錢買假證，然後被騙誤搶一袋白粉入到城寨，再被誤會想插旗遭痛毆。他一直只想拿回自己應得的，偏偏就被各路人馬夾擊，觀眾自會替他不值。到後來捱生捱死終有好日子過，上一代恩怨竟又突然搵上門，明明自己都是痛失父親的受害者，但就成了殺人填命的祭品，所有不公都集於一身。
最好的元素都放在這角色上，問題是林峯有冇能力發揮？事實上，廿年的拍劇經驗並沒有白過，戲中其情感演變流暢自然，連情緒爆發力度都準確掌握，昔日說他TVB味太重，電視味太濃唔適合拍電影，其實都是取決於導演功力，是否能夠安排一場「淨味」洗禮，讓觀眾重新認識林峯。
其實洗得咁辛苦，歸根究底都是由一個獎而起。2009年年底發生四大唱片跟TVB因版權問題而杯葛頒獎禮，令亞太區男歌星一獎未有具份量的歌手領取，然後本住肥水不流別人田原則，安排頒予親生仔林峯，結果這口肥水不單止沒助長反跣死人。它不代表實至名歸，而是表明黑箱作業私相授授，毫無意義更招來無實力的話柄，靠關係得獎。
金曲金獎〈Chok〉更尷尬
而翻看當年林峯的成績，2007年推出首張專輯，已經找到第一首金曲〈愛在記憶中找你〉，隨後第二張專輯又有〈愛不疚〉，屬形勢大好，但一個無謂的獎座，令本應可飛到真正亞太區的他，牢牢被困於亞皆老街至太子道西一帶。而該獎一拎便拎足三年，最後一年更加碼送多個金曲金獎〈Chok〉，再下一城將林峯與尷尬連為一體。據當時任總經理的陳志雲事後憶述，當日他是反對頒發這個獎予林峯，事關他是有潛力的歌手，但當刻未有實力拿這個獎，只會害了他。奈何會內有其他高層一意孤行。
15年喇，林峯被造標籤足足15年，可以幻想，當時林峯身處之地，是比龍捲風更強的風眼，多年來仍能受得起吹襲，實在是經歷過一場又一場的死去活來。《九龍城寨之圍城》最後一段，播出岑寧兒《風的形狀》，在結尾時聽，是一下妙絕的點綴。最後的一句歌詞︰「乘著那風 沿路感覺 何其遼闊空曠 流淚的過雲雨或遙望清朗 讓一切沒定案」一字一句放在林峯身上，原來同樣適用，好讓他營造出專屬自己的「峯的形狀」。
撰文︰余建
Facebook專頁︰https://www.facebook.com/Stupid.View
留言 12
Jenny Wong
筆者不應劇透！
05月07日05:12
ET
又是一篇廢話，音樂獎根本沒有拖累林峯，只是他未遇到機會
05月07日06:05
honghong
咁都要搵舊野去踩大台！你唔L講下妖台夾硬俾獎條肥姜咪一樣！
05月07日05:00
洛子楓
「"考"順仔」
🤡
「是比龍捲風更強的風眼」
風眼唔係平靜嘅咩？🤨
當然俾風眼以外其他部份掃過就另計🙉
…除非可以走得好似風眼咁快😅
05月07日06:10
咬蔗的老野(Prime)
套戲真係唔錯，不過同樣TVB, 古生演技仲係咁令人老尷。
05月07日03:55
顯示全部