文化沙漠？出版林立！
好多人都聽過都講過，香港，根本就無文化可言，只係一座文化沙漠嘅城市！咩叫沙漠？即係咩都無，無人關心香港文化，甚至可以話係香港文化已死。但事實上，呢種講法係站唔住陣腳嘅，因為單單睇香港有幾多出版社存在，出咗咁多唔同類型，各有特色嘅書籍，已經證明咗香港唔係文化沙漠喇！不過，香港到底係咪一座熱愛文化嘅城市，就係靠各位香港人有幾支持。咁香港人除咗識去大出版社買書，又有冇去睇睇其他相當高質嘅小型出版社？今日就等DailyView用網路大數據，數出香港知名嘅十大獨立出版社，等大家可以多多支持喇！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 次文化堂（1104筆）
——敢言、自主
咩叫次主化？有次文化，即係有主文化。次文化未必差過主文化，不過可能因為各種權力，令次文化唔受重視。次文化堂嘅成立，正係要話畀世人知，香港除咗主流文化，仲有其他重要嘅文化，值得我哋重視。好似我哋香港人講嘅粵語咁，《次文化語言：香港新方言概論》、《小狗懶擦鞋：香港粗口文化研究》、《香港潮語話齋》咁，都令我哋更進一步認識自己獨特嘅本土文化。好多作者好似陳雲、黃毓民、劉天賜、吳志森等，都係一時人物，可能主流唔Buy佢哋，但佢哋講嘅嘢好有意思。次文化，係香港重要文化。
image source:FB／次文化堂 Subculture
9 小樹苗教育出版社（1111筆）
——兒童課外讀物
香港兒童課外讀物出版社老字號，小樹苗教育出版社成立喺1988年，真係陪伴咗一代又一代嘅香港人成長。好多八十、九十後嘅童年，都曾經睇過小樹苗出版嘅書籍。而未來，下一代，下下一代嘅細路仔，好可能都會繼續咁睇《小朋友最想知道的十萬個為什麼》，培育、鼓勵佢哋勇敢發問，有科學家嘅好奇心；《我的小百科：恐龍圖鑑》，滿足小朋友對怪奇生物嘅幻想，令佢哋有更加多嘅想像力；《伊索寓言》，等佢哋讀更多有趣嘅故事，唔單䢋增進小朋友嘅語文能力，從寓言中了解人生道理。小樹苗，用書本灌溉。
image source:FB／小樹苗 Sesame Publication
8 大銀力量（1142筆）
——關懷老人社群
「人生下半場三大不安：健康、經濟、孤獨。」大銀力量，點出咗人生必經，但最少人關注、討論嘅階段，即係「老、病、死」。每個人如果無咩意外，順利咁過完大半世，就必須面對隨住年紀老邁而出現嘅健康問題，伴隨住退休無收入之後嘅經濟問題，仲有身邊人一個又一個離開，得返自己嘅孤獨問題。晚年人生三大問，大銀力量嘅成立，正係為咗陪伴老人家一齊思考、討論同面對呢三大問，佢出嘅月刊《大人》、出版生死關懷題材如《香港好走》、《見棺材》、《生死學堂》等書籍，我哋一齊閱讀人生三大問。
image source:FB／大銀 Big Silver
7 突破出版社（1195筆）
——青少年大突破
香港要有文化，有文化，仲要將文化發揚光大傳遞落去，後生一代嘅文化培育、閱讀習慣可謂至為關鍵。突破出版社，呢間機構嘅宗旨正係為咗令青少年嘅需要而生，希望透過文化活動發掘佢哋全人潛能。市面上我哋見到突破出版嘅書籍，好似香港人都見過嘅火柴人咁，喺佢哋嘅突破出版社書店經過都會見到。突破出版社好多正面、陽光嘅書，例如《相愛不傷愛——感情與理智的拿捏之道》，就相當暢銷。除此之外，都仲有突破書誌 Breakazine!，雜誌都有唔同嘅主題，內容深入淺出，相當高質，留意香港時事點可以唔撐？
image source:FB／突破書籍
6 香港文學生活館（1209筆）
——香港有文學
香港文學生活館嘅成立，一再反映咗本土文學喺香港生存唔容易，皆因喺台灣、大陸，文學館都係有官方畀錢支持，有資源咁建立出嚟。但係喺香港，香港文學館之所以可以喺2012年成立，全部都係靠民間自發嘅力量。香港文學生活館唔止係有空間展覽嘅簡單，佢同時都有出版書籍，承擔香港文化傳承嘅責任。話明係香港文學，呢個館出版嘅緊係主力喺香港經典文學作品喇！好似香港文學女神韓麗珠第一本散文集《回家》，藝術家、音樂家黃仁逵散文集《放風》，真係文青必讀！最緊要係，香港唔係沙漠，香港係有文學！
image source:FB／香港文學生活館
5 kubrick（1335筆）
——香港文化聚散地
kubrick喺2001年成立，最初只係為咗滿足香港百老匯電影中心觀眾嘅需要，放咗書籍、影碟、唱片等畀佢地享用。但係去到2003年，kubrick呢間書店愈做愈大，開始出版咗第一本書，之後持續出版，至今已經出版數百本書。kubrick出版嘅書籍內容，主要係香港文化、文學，推動咗成個香港文化界嘅發展。好似李智良嘅散文集《房間》，黃仁逵、陳慧、王良和、林超榮、區家麟、麥樹堅及韓麗珠等人合著《年代小說˙記住香港》，仲有好多名家如崑南、廖偉棠嘅著作咁，如果你自認係香港文化愛好者，佢出版嘅書點可以錯過？
image source:FB／kubrick
4 綠腳丫（1447筆）
——親子齊讀書
做家長嘅朋友，相信都一定有聽過綠腳丫呢間出版社嘅大名。點解？皆因為人家長者，多多少少都想自己嘅細路仔讀多幾本書，有多少少文化氣質。不過講就容易，細路仔唔定性，邊有咁好心機同你睇書先！綠腳丫就話畀你知，其實唔難，有心嘅話，一定會搵到方法。綠腳丫已經有搞咗好耐、好成功嘅「親子讀書會」，細路仔未必想睇咁多字，咁就不如一齊讀繪本喇！綠腳丫亦都出版咗唔少繪本，好似《香港遊》咁，內容充滿教育意義不特止，仲要以香港做主題，大人細路睇落都會特別有親切感，有小朋友嘅一定要買。
image source:FB／綠腳丫
3 創造館（2107筆）
——時代的巨浪
2013年，作家余兒創立咗創造館出版社，由最初一人經營到而家有數十位嘅知名香港作家駐館，正正反映咗創造館嘅成功。到底係時勢造英雄，抑或英雄造時勢？喺創造館，或者係兩方面都有，相輔相成。創造館嘅理念，係面對如今紙本式微，創造館就積極為作家、作品尋找跨媒體改編嘅機會，希望令創作人付出嘅心血，得到應有嘅回報。創造館有出版好多暢銷作品，好似《今晚打喪屍》、《婚姻這種邪教》、《九龍城寨》等等，一再為書本搵出另一條生路，平衡文化、商業之間的唔同，創造出香港文化界嘅巨浪。
image source:FB／創造館
2 點子出版社（3024筆）
——高質流行讀物
點子出版社，喺香港引領網路小說成為實體書，造成香港網路文學熱潮嘅重要推手。好多人都話香港無人睇書，出咗書無人買，好多出版社都要收檔之際，偏偏香港好多後生仔都仲有睇書、買書。不過，後生仔女未必鍾意睇經典作品，佢哋嘅閱讀習慣唔係紙本，而係手上嘅手機，係網路上嘅高登、連登。有見及此，點子出版社正係睇中咗香港人閱讀心態嘅轉變，推出好多網絡作品，包括《Deep Web File #網絡奇談》、《診所低能奇觀》、《天黑莫回頭》同《壹獄壹世界》等，大熱暢銷，證明咗香港人都仲好鍾意睇書。
image source:FB／點子出版 Idea Publication
1 本土研究社（4691筆）
——香港民間學者
本土研究社喺2014年註冊為非牟利組織，成員係一群有志推動民間研究，同關注香港發展嘅香港人，同時亦都係俾大家共同參與嘅實驗平台。哇，講到研究呢兩個字，好似不食人間煙火咁喎。本土研究社嘅主張，正係要將研究帶出象牙塔，做貼地嘅本土意識、土地問題 、社會議題等主題研究。好似香港人呢幾年成日都會聽到嘅「丁權」問題咁，本土研究社就出咗《丁不厭詐：新界套丁研究報告2017》。另外，香港成日話土地供應有問題，搞到無屋住，又有本《不是土地供應：香港土地問題的迷思與真象》，睇個名都想睇！
image source:FB／本土研究社 Liber Research Community
分析說明：
本研究資料由《KEYPO大數據關鍵引擎》提供，分析時間範圍為2018年10月31日至2019年10月30日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『香港十大獨立出版社』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
