【搵食CONY】銅鑼灣DONKI食品有驚喜　直擊精選優惠及必買推介

大家睇完CHOCO介紹完DON DON DONKI銅鑼灣店嘅基本資料同美妝方面嘅特色之後，係咪意猶未盡呢？話說美妝其實只佔整間舖的其中一層，其餘3層則主打各式食品和生活百貨，教人花多眼亂，等貼心嘅CONY為大家細心整理新店重點，以及精選優惠及必買產品啦。

新引入「近江牛」　必行$9特賣蔬菜區

CONY行街鍾意由最頂層開始行，所以介紹亦由3樓開始講起啦！3樓主要係蔬果肉類、刺身及糧油雜貨專區。除了有一貫嘅日本時令蔬果及各款新鮮肉類，新店更引入有日本三大和牛之一美譽嘅「近江牛」，有齊用來食shabu shabu的肉片、用來燒的肉件和牛扒等，仲有超肥美拖羅刺身，可選原件自己返去慢慢切，亦有切好拖羅片供選擇。另外慳家寶寶必行$9特價蔬菜區，當日所見有日本大蔥、豆苗、青瓜及番茄等。

新店首次帶來自家品牌「情熱價格」與日本著名家庭用品品牌「LEC」推出的清潔用品，包括清潔力超強的環保海綿（左）及電解水（右）。

酒品齊全　日本直送原板海膽

行落2樓，係熟食、海產壽司、酒類及急凍食品專區，當中酒類嘅貨品比起其他分店更加齊全，有威士忌、紅白酒、果酒、啤酒，以及近期當造嘅梅酒和其他特色酒品。呢層仲有多款日本手信，想送禮嘅朋友可以主攻2樓。至於熟食方面就同另外兩間分店大同小異，而壽司方面，大拖羅壽司及原板海膽有做開幕優惠，有興趣嘅朋友切勿錯過。