佬編理想中的舖頭 SALES，是像已經培養出默契的同事一樣，打個招呼後，無嘢就做自己嘢，有嘢，就做嘢。與理想中的舖頭 SALES 交流，也像有默契的同事講公事一樣，直接、有效率而不多廢話。
係現實世界黎講，最接近佬編理想型的 SALES，是類似 APPLE GENIUS 的 SALES，有招呼但不會過度搭嗲，視線不會隨着你走，而有需要的時候，總是很快找到人。
最搞唔掂的類型，除了西面名店 SALES 以外，就是那種走博物館 AUDIO GUIDE 風的 SALES。說話千篇一律、但行動卻是貼身人盯人戰術，每當你視線掃過一樣產品，就會播出一段簡介同推廣優惠。對這種 SALES 來說，客人 HEA 應背後的拒絕意味，會被視為認同和鼓勵，令他們越講越起勁。唯一終結惡夢的方法，是用堅定的語氣答「我自己睇下得架啦，唔該晒」。佬編想像，這種風格的 SALES 一直都在，應該是因為有很多受落的顧客吧。
對於老闆來說，上面這兩種應該都不是最理想的 SALES。最稱職的 SALES，應該是那種可以令人感覺 FRIEND 底的 SALES。他的存在並不是要令你購物，而是好似個 FRIEND 咁，幫你手揀樣嘢，買唔買唔緊要。佬編遇上這種 SALES，總會盡量迴避。因為帶着人情味的推銷，最難 REFUSE。
