家居裝修紀錄（8）- 門的價格不是全部，門框的價格讓你失預算

【買樓裝修紀錄】上回同大家講到門嘅種類，今次就同大家入戲肉，講講門嘅價格。

一般來講行入門店，會有好多款唔同嘅門擺出來俾大家揀（門店唔俾拍照，所以無相輔助說明）。大部份嘅門店將房門及大門分別放係舖嘅左右兩邊，或者前後擺，想睇咩門入去問清楚先好睇，唔係睇成粒鐘都睇錯種類。

門店擺出來嘅門睇落雖然好多款色，但其實來來去去都係個幾隻「木皮款式」及「木皮嘅顏色」。如果唔係揀防火門嘅話，基本上你睇到嘅「款式」及「顏色」係可以隨便搭嘅。

實價可能比面價貴一倍

揀好左門款、木皮款式、木皮顏色，當然係埋位計數俾錢，但係當你埋枱嘅時候就會發現埋價錢係你求先望到嘅 0.5 – 1 倍。你望個門款係 HK$1,500，埋單可能要 HK$3,000；望到係 HK$2,500，埋單可能要 HK$3,500。

點解會咁？好簡單，因為你求先一路係到揀嘅木皮款式及顏色只係講緊「門」本身，配合「門」使用嘅「門框」係唔計在內的，而門框嘅價錢係無寫出來，所以當你埋枱嘅埋門框價錢時同你一路睇緊嘅會有差距。

實際案例分享

為左清晰說明，石先生去其中一個知名可靠嘅「三木」門店求其問價，等大家都有個參考。頭兩行（A）係實門款 A；（B）係實門款 B；而第三行係指門框，分別寫上（A）及（B）嘅門框價格。

大家可以見到，（A）門嘅價格係 HK$2,500，而門框嘅價錢就係 HK$1,650，夾埋要 HK$4,150；（B）門係 HK$3,150，門框要 HK$2,050，總數夾埋 HK$5,200。如果你無預門框嘅價錢，就咁行入去門店睇門，睇到啱哂，然後埋枱先要再加多啲 Budget，真係繼續去又唔係，再揀過又浪費時間。

既然係咁，門又係咪一定要門框呢？ 哈！其實又唔係，下回再同大家分享。

【家居裝修紀錄】
● 家居裝修紀錄（1）- 睇樓與揀樓
● 家居裝修紀錄（2）-「真．首期」俾幾多？
● 家居裝修紀錄（3）- 電制制面價格差一倍，走進內街很重要
● 家居裝修紀錄（4）- 電制單制定雙制？唔好係咪都雙制
● 家居裝修紀錄（5）- 牆的電制要有 USB 嗎？
● 家居裝修紀錄（6）- 電制圖點劃好？直接劃上去吧
● 家居裝修紀錄（7）- 買門？門最少都有分三種
● 家居裝修紀錄（8）- 門的價格不是全部，門框的價格讓你失預算

【此文章刊載於石先生部落；標題：家居裝修紀錄（8）- 門的價格不是全部，門框的價格讓你失預算；本篇文章為贊助內容；強制廣告：HisTrend.HK 給你不一樣的科技產品】

Related