成日有人問我：「如果喺歌舞伎町，跟咗啲著西裝拉客嘅日本人或者非洲人去嘅話，到底會點樣？」
如果你好富有，唔介意俾好多錢，無論係齋飲嘅夜總會定係其他服務，你都會玩得好開心。但係如果似我並唔富有，就要小心。
我2014年6月初到日本冇耐，同3個朋友去居酒屋飲到半夜3點鋪頭收工，冇電車返屋企。大家都好醉，又唔想喺街邊遊蕩，想搵個地方坐低。
突然有個非洲人走嚟問我哋：「You guys want Japanese girls？」
wow！
我哋話唔駛，只想要個地方坐底。
非洲人：「Ok，咁1000yen兩個鐘飲嘢放題如何？」
我哋討論一陣，決定跟佢去。臨上樓前再三同非洲人確認：「We don't need other services, we only want drinks. No additional charges right?」
非洲人肯定地答「Yes, of course.」
上到一間好似卡啦OK房嘅地方坐低俾咗1000yen，我點咗一杯果汁，嚟嘅卻係一杯酒。
然後，非洲人同我哋講：「每位2000yen。」
說好嘅1000yen，變成3000yen，我哋當然唔肯俾，開始同非洲人理論。
跟住，我朋友攞出電話話要報警。
非洲人突然對嗰位朋友發火，搶咗佢嘅手機：「Why do you ruin the system!!! Why!!!!」，作狀要對佢施襲。
我即刻分開兩人，同佢講：「得！我哋唔會報警！你俾返手機佢，我哋就走！」
爭執咗一陣，5個人半推半撞入𨋢離開。
落到樓下，非洲人將電話拋俾我哋，轉身入𨋢離開。
電話雖然攞得返，但錢當然攞唔返，好彩大家冇穿冇爛走返出嚟。至於非洲人所講嘅「system」，其實就係俾完錢仲有額外付加費。
呢啲拉客鋪頭，係冇明碼實價。引你去嗰陣係一個價錢，埋單嗰陣要予多幾倍。喺度奉勸各位，除非你予咗俾人呃，唔係嘅話千祈唔好好似我咁蠢，跟啲拉客嘅人上去喇。
