一向是非多多的江嘉敏（Kaman），日前再被捲入新是非中，被一名自稱是其前粉絲的網友在討論區出post力數她多宗罪狀，包括愛卸責、貪心、態度差等，對這次是非，江嘉敏非常勞氣，逐一反駁該名前粉絲的指控，更話近排多了很多攻擊她的假Account，她說：「我已經Block咗好多個Account，同Delete咗成二千幾個留言！」

文：東方新地｜圖：江嘉敏IG圖片及新傳媒圖片庫

江嘉敏被前粉絲叫「檢討吓」

是非新聞一大籮的江嘉敏（Kaman），去年中因船P事件同馮盈盈（FYY）反目收場，姊妹情不再後，還不時咬住唔放繼續向FYY挑機，不過近日無綫宣布開拍新節目《解構心機女》，就安排這對已反面的前「姊妹花」做拍檔，齊齊學日本人氣節目《有點心機又如何？》探討用自己身體語言來吸引異性的「心機女」，焗住兩人「破冰」來製造話題。

江嘉敏再惹是非被前粉絲力數五宗罪 — 曾經好到去邊都孖住行動的馮盈盈及江嘉敏，自去年中船P羅生門事件反目，姊妹情亦一去不返，想不到事件發生未夠一年，兩人又被無綫焗住「破冰」。

新節目將於3月底開播，首次在無綫擔任主持人的江嘉敏，未開工先再度惹來新是非，被一名自稱是她前粉絲的網友，在討論區以「入咗FANSCLUB先知江嘉敏係有幾黑暗」為題出post，對江嘉敏表示：「你見到咁多粉絲走晒就檢討下啦。明明一出道評價都無咁差，個樣又幾呃得下人，點解幾年就可以衰落成咁？好多人一開始嘅評價仲差過你（例如FYY一開始都比人話粗口港姐㗎）但佢哋依家已經一早爬得高過你，你估人哋冇唔開心過？」

第一宗罪：愛卸責

該名前粉絲指責：「江嘉敏最大嘅問題係在於從來唔覺得自己有問題。次次有咩事都剩係識不斷為自己辯駁，將責任推向人哋度，有無限嘅藉口不斷死雞撐飯蓋。」

江嘉敏再惹是非被前粉絲力數五宗罪 — 該名前粉絲話好多謝江嘉敏曾在其人生最抑鬱時和他講加油，只是他沒法接受自己點解要咁多年先可以睇清楚她真正為人。（圖為2017年一眾粉絲現身支持江嘉敏活動照）

第二宗罪：態度差

江嘉敏被前粉絲指：「EQ又低又串串貢又貪心，態度差過好多輩份比佢高嘅偽人，公司又點會想捧呢啲帶來咁多麻煩嘅人。」另外亦有一名網友爆料指：「早兩年賣衫，佢試過R sponsor，真人態度X，又串XX咁，呢頭同你笑哂口，轉頭就叫第二個講，多多意見！」

江嘉敏再惹是非被前粉絲力數五宗罪 — 前粉絲指江嘉敏真人串串貢、態度差，仲人前人後兩個樣，十足雙面人。

第三宗罪：貪心

該名前粉絲又指控江嘉敏貪心，曾在網上問粉絲搵氣球，疑似「攞著數」：「你喺出面點R Sponsor我唔在意，但唔好畀我知你真係無論去到邊都想攞人著數好冇；叫人幫你買嘢又唔識還番錢畀人。雖然冇損失好多錢，但呢啲係基本禮貌同尊重。」

江嘉敏再惹是非被前粉絲力數五宗罪 — 前粉絲指江嘉敏曾在網上問紛絲搵氣球，之後在她和男友生日時現場都放滿氣球，疑似成功「攞著數」。

第四宗罪：無交帶

前粉絲又指責江嘉敏在台灣時拜託其他明星的Fans代她購買三文治，但買完後無講幾時交收：「雖然都係食物，唔係D咩貴價嘢，但呢個係基本禮貌。就算人哋冇打算收你錢，你都應該答謝人哋幫你買，同埋好好交代番。以為自己好紅咩，出Trip驚死人哋知佢住邊間酒店，約佢交收又唔應。嗰日佢班機提早咗又唔交代聲。」

江嘉敏再惹是非被前粉絲力數五宗罪 — 江嘉敏被指在台灣曾拜託其他明星的Fans代她購買三文治，但對方買完後江嘉敏無講幾時交收，連班機要提早飛都無交待聲，最後該粉絲要搭的士趕去機場「送貨」。

第五宗罪：當粉絲下人

江嘉敏又被指對待粉絲有如下人一樣，該名前粉絲說：「佢好高竇㗎，對著啲Fans呢好似我哋係下人咁。之前Gathering佢完全唔幫手set場，走又唔講Bye bye，話送英國手信畀我哋，但啲手信係擺咗一年先送，仲要唔係親手畀，而係叫Fans club其他人幫佢比。真係有心送嘅話會唔會係咁。對著Fans佢都咁，想像唔到對著其他外人會係點。」

江嘉敏再惹是非被前粉絲力數五宗罪 — 講到呢個point有唔少網友都反駁話覺得Fans Gathering由粉絲set場係冇問題，由偶像set場先係怪。

江嘉敏反駁：完全係作出嚟

對這次是非，江嘉敏非常勞氣，認為該名網民並非她真正粉絲：「自稱粉絲即係假啦、扮係我粉絲，我相信我嘅Fans唔會做啲咁無聊嘅嘢，睇佢所講嘅嘢，佢真係唔了解我，係完全作出嚟，而且近排都好多假Account，我留意到佢哋不停講粗口、鹹濕嘢、惡意抹黑我，我都Block咗好多Account，同Delete咗成二千幾個留言！」

江嘉敏再惹是非被前粉絲力數五宗罪 — 江嘉敏表示自己從來不會叫粉絲買禮物：「因為我啲Fans年紀仲好細，仲讀緊書未有工作，所以佢哋送嘅貴重禮物我都會退番去。」

江嘉敏又逐一反駁該名前粉絲的指控，講到被指叫台灣粉絲買三文治一事，她解釋當時她在台灣拍劇，有一個台灣粉絲去探過他們幾次班，她說：「個粉絲好好，成日買水果、飲品、三文治畀我哋全部劇組人員食，唔係淨係請我一個食，佢都係我哋個劇幾個同事嘅粉絲，唔係我一個粉絲，我覺得粉絲嚟探班，問我哋想食乜係好普通嘅事，唔明啲人點解要扭曲抹黑人哋嘅好意。」

江嘉敏再惹是非被前粉絲力數五宗罪 — 江嘉敏指曾有粉絲在她出Trip時到場探班：「佢都有主動問我想食啲咩，話請我食，咁其實都好正常。」

至於搵衫𢱑贊助，她指絕對冇可能：「首先我因為我有經理人，我公司會幫我處理晒所有嘢，絕對唔會叫任何一個粉絲去處理，其次我都識好多客戶，佢哋好疼錫愛護我，去乜嘢Event，佢哋會幫我揀適合嘅衫，我又有自己嘅Stylist，我嘅工作絕對唔會叫粉絲做，如果唔係點解要畀錢請Stylist？唔可以扼殺佢哋嘅努力同好意。」

江嘉敏再惹是非被前粉絲力數五宗罪 — 講到問粉絲搵氣球疑似「攞着數」，江嘉敏說：「我只係要搞派對，想問吓大家意見參詳吓，冇叫佢哋去買或搵！」

同場加映：江嘉敏對人態度兩副面孔開工擺阿姐款

現年26歲的江嘉敏出道經常扮玉女，不過玉女假象背後卻姣出汁，除了拍劇愛姣對手，又被爆愛黐富二代，兩年前撻著電競公司高層Anthony火速同居，冧到仔依然未收手，去年中被爆同馮盈盈一齊去船P，卻因事件被撞破各執一詞變羅生門，姊妹從此反目，江嘉敏亦極速埋新姊妹堆，黐林凱恩同小小超女友郭嘉文玩埋，生活繼續多姿多采。

直擊姣精江嘉敏開工擺阿姐款黑口黑面向助手訓示 — 無寶不落的江嘉敏，近期經常黐實林凱恩變好姊妹，更透過林凱恩結識小小超女友郭嘉文，相當進擊。早前更同郭嘉文、鄺潔楹（Judy）齊齊為林凱恩補祝28歲生日。

江嘉敏再惹是非被前粉絲力數五宗罪 — 18年撻著電競公司高層 Anthony，江嘉敏冧仔花臣多多，扮可愛自拍更手到拿來！

熒幕前經常笑容滿面、天真可愛的江嘉敏，對住助手原來另一個樣，更加男女有別。早前本刊就影到她和女助手出外工作時，頻擺阿姐款，黑口黑面向助手訓示，當正助手係阿四，相當難服侍！

江嘉敏再惹是非被前粉絲力數五宗罪 — 早前江嘉敏一個人離開九龍城寓所，企在街邊等的士，雖然戴住口罩，都可見她眉頭緊皺。

江嘉敏再惹是非被前粉絲力數五宗罪 — 同助手在新蒲崗工作完畢，雖然有助手陪同企街等的士，不過等極都無車，大小姐已玄壇口面，向身旁助手發火！

據知情者透露：「咪睇Kaman 外表好似乖乖女咁，真係畀佢食咗你都未知，佢份人好有心計，鍾意黐埋班有錢仔度，啲富二代鍾意識女明星，佢就成日拉埋啲姊妹一齊去玩，有殺錯冇放過！不過，佢對男仔就嬌滴滴，對啲男工作人員會放晒電，但對女助手就會擺阿姐款呼呼喝喝，有乜安排唔周到就發脾氣，真係唔易服侍㗎！」

江嘉敏再惹是非被前粉絲力數五宗罪 — 江嘉敏乘的士到達尖沙咀，落車時便命令助手幫她拿手袋。

江嘉敏再惹是非被前粉絲力數五宗罪 — 江嘉敏捧住個紙袋，邊行邊訓示身旁助手，只見助手一篋一袋，還要幫她攞住手袋，仲被她沿途訓話。

早前她由寓所出發開工，等車期間已經皺晒眉頭相當不耐煩，去到會合助手更加玄壇面口，完成上半場工作，同助手一齊等的士，等了幾分鐘未有車，更黑口黑面向助手發火，之後坐的士去到目的地，見助手拖住個篋還孭住大袋嘢，依然要對方幫她攞手袋，工作完畢準備歸家才自己拿回手袋，麻煩態度現晒形！撕開玉女假面具，江嘉敏醜行愈揭愈多，仲有冇人敢埋身？

江嘉敏再惹是非被前粉絲力數五宗罪 — 同傳媒做完訪問後，江嘉敏同助手行去街頭上Uber。

江嘉敏再惹是非被前粉絲力數五宗罪 — 江嘉敏在牛頭角放低助手後，再乘 Uber返回九龍城寓所。

請更新您的瀏覽器

江嘉敏再惹是非 被前粉絲力數五宗罪 逐點勞氣反駁話⋯⋯

江嘉敏再惹是非被前粉絲力數五宗罪逐點勞氣反駁話⋯⋯